ماني مبدلها

[الوصل]

مادام بقلـوب الكريميـن لـي دار=مانـي مبدلهـا بلـيـات ديــره
ربعي لهم في ذروة المجد مقـدار=ماتاصله شـم النفـوس الكبيـره
سلام ياصلهم من اكبار واصغـار=من ديرة اهل الكسكسي والحريرة
وسلام ياصلهم من اسبانيـا حـار=حرارة البايـا معـا كـاس بيـره
وستيك بيف بكبنهاقن علـى نـار=يحمل سلامي لين كـل العشيـره
وش عاد باقي ينحكي صرت محتار=وانـا بديـره ماتعـرف الستيـره
حتى ولو خضرا مغطـات بازهـار=والماء تسمع فالمجـاري خريـره
بقـول ماتسـوى بهالبيـد نـوار=عقب الولي مايسقي الدار خيـره
ولاهي بتسوى جلسةً وسط شعـار=يـوم الليـال اقمارهـا مستديـره
ولاهي بتسوى شوفة الذود صدار=عقب الزوال مقوطراتً عصيـره
داري عزيزه دون ما فالفلـك دار=يرتاح فيها كـل مسلـم ضميـره
سـلام يـادارً بهـا فالسمـا دار=خمسة فروضً فالمـآذن سفيـره
احبها لـو جوهـا حـر واغبـار=واصبر على ملهابهـا فالظهيـره
دار الرسول اللي على سكته سـار=حكامنـا ياطيبهـا مـن مسيـره
من دارنا تشرق هدايـات وانـوار=غاطي على كل المساكـن عبيـره
ومادام ذي داري فلانـي بـدوار=ياطيب مسكنهـا وياشيـن غيـره

شعر : الوصل


ملاحظه: البايا: هي وجبه اسبانيه شعبيه تشبه الكبسه
كبنهاقن: عاصمة الدانمارك
الكسكسي: وجبه مغربيه
الحريرة:شوربه مغربيه

[أبوشديد المثيلي]

مشكور أخوي على القصيدة الجميله

ومشكور على الترجمه اللي في الأسفل ولا يمدينا مافهمنا نص القصيدة


تقبل مروري

[مضحي السلمي]

الغالي الوصل والتواصل الجميل

نشكرك على الاباع الراقي ونتمنى ان تتواصل معنا ولو انك بعيد ديار من مايزيد الشوق لك الله يوفقك

[عبدالسلام السلمي]

الوصـــــــــــــــــــــــــــل

أبيات جزلة

وتصوير رائع.......

لك تحية طيبة

دمت بود

[حسين القويعي]

شعر : الوصل

كــفــو

صــح لــســانك
يالـوصـل
قصـيـده
رائعه ووصف رائع



بيض الله وجهك على القصيده الرائعه
وإلى الأمام




بإنتظار المزيد من إبداعاتك

[الوصل]

صحت ابدانكم جميعا
والمنتدا يستاهل اكثر
وجهود المنظمين مشكوره
وشكرا لكم على مروركم

[فراس السلمي]

صح لسانك يا الشاعر الواصل



والى الامام وننتظر جديدك

[ولد النشاما]

مشكور اخوي على القصيدة الرائعة
وصح لسانك

[سعـد السلمي]

سـلام يـادارً بهـا فالسمـا دار=خمسة فروضً فالمـآذن سفيـره
احبها لـو جوهـا حـر واغبـار=واصبر على ملهابهـا فالظهيـره
دار الرسول اللي على سكته سـار=حكامنـا ياطيبهـا مـن مسيـره

صح لسانك و بيض الله وجهك ياشاعرنا المتألق ( الوصل ) على هذه القصيدة الرائعة وعلى تفسير بعض كلماتها

تقبل مروري وودي واحترامي

أخوك

العجيفي