من عز نومي صحيت

[ياسرالربيقي]

من عز نومي صحيت وشفت في عيني..!
دمع تهادى على جفني وأنا غافي
سترت دمعي بكمي قبل يغريني ..!
وأخذت هذا الجسد من باقي لحافي
وسريت تايه ورى خطوات رجليني ..!
لا الوجه وجهي ولا أوصافي هي أوصافي
أمشي وأقول لطريقي لا توديني ..!
لعيون ناس تبي تدري عن الخافي
أمانة .. خلها مابينك وبيني..!
خابرك يالدرب خوة عمر وسنافي
ماودي الناس تدري وش يبكيني ..!
كرامة النفس ورث أبوي وأسلافي
أمشي وأحس الخناجر في شراييني ..!
والبرد يمشي وراي وينهش أطرافي
وحيد والليل بردونه يغطيني ..!
تقول كن البلد روح بها السافي
إلين ماأوحيت لي صوت يناديني ..!
صوت أعرفه مثل ما أجهل وش خلافي
قمت أتلفت وأنادي ... لا تخليني..!
ماغيره الصوت .. هذا صوته الدافي
تعال .. شف غيبتك كيف أثرت فيني..!
تعال .. شفني وأنا أغرق عقب مجدافي
تعال.. خذني ورحبي من عناويني ..!
تعبت أعدي على جمرك وأنا حافي
تعال وإقطف بصوتك زهرة سنيني..!
كل المواعيد عقبك شمعها طافي
تعال وش فيك خايف ؟ أنت ناسيني ؟
قطعت صوتي عليك وطال ميقافي
حتى بديت أشعر إن الحب معميني ..!
وإن أنت حلم عثى فيني وأنا غافي
لكن أمانه ترى اللي فيني كافيني ..!
إن رحت منك كذا مارحت متعافي
بصّدق الحلم وأحذر لا تصحيني ..!
في خاطري كلمتين وإن قلتها كافي
أمانة الله عليك إن غبت عن عيني..!
لا يكون قلبك مثل قلب الزمن جافي
ما ودي الناس تعرف وش اللي يبكيني
ومع كل ضحكه تذكر قلبي الوافي

[حمدان بن مقحص]

أمانة الله عليك إن غبت عن عيني..!
لا يكون قلبك مثل قلب الزمن جافي



الاخ / ياسر الربيقي

صح لسانك على هذا النص الجميل

اعجبني كثيراً

[مضحي السلمي]

الاخ الربيقي هلا وغلا فك وصح لسانك على هذه الفاتنه

ولكن اود ان تمر على قوانين منتدى روائع الشعر حيث لايمكن انزال اكثر من قصيده في

خمسة ايام حتى تاخذ المشاركه نصيبها من الردود

وفقك الله يالغالي

[عادل المحمدي]

الاخ /ياسر الربيقي


اشكرك على النقل الرائع والاختيار الموفق



ولكن من الامانه ان تشير الى ان المشاركه منقوله




وان تطرحها في القسم الخاص بالمنقول




ولك ودي / عادل المحمدي

[جابر السلمي]

ياسر الربيقي

ونقل جميل للشاعر فهد المساعد السبيعي

قصيدة تملأ فراغ الشعر

صح لسان فهد المساعد

وشكرا على النقل

[ابو نوره]

ابدااااع في ابدااااع

ماشالله تبارك الله

صح لسانك اخوي على هذي القصيده الاكثر من جميله

وفقك لكل خير

دمت بود

خالد السلمي

[ياسرالربيقي]

الله يعطيكم العافيه جميع

[الأذيني]

إلين ماأوحيت لي صوت يناديني ..!
صوت أعرفه مثل ما أجهل وش خلافي



أخي الفاضل/ ياسر الربيقي




قصيدة رائعة وجميلة ومعبرة
شخصيا أخذتني بما فيها من جمال وروعة





فلك مني كل الشكروالتقديروالاحترام وأصدقه




دمتم بخيرٍ وود

[ماجد اللبيني]

الله يعطيكــ العافيهـ،،
ونتطلع الى المزيد
مشاااااااااركة رائعه