رد: ديوان الشاعر حمدان بن عامر الشكري (ابن مقحــص)
 

(خلك حكيم ألراي)

خلك حكيم ألراي فعلٍ ومنطوق
وإحسب حساب الناس تحسب حسابك

واثقل ولاتاتي خفيّف ومطفوق
من شان تحشمك الرجال وتهابك

ولاتعلق الشرهه على كل مخلوق
ولاتصك عن باب المواصيل بابك

وان جتك هرجه طايشه فارتفع فوق
لاتنزعج منها وتفقد صوابك

واحذر من اهل الكذب والمكر والبوق
لاتختلط معهم لو الحظ جابك

عنهم تجنب وأطلب الله من فوق
اللي. خلقك وكونك واعتنابك

وخلك مع أهل المنطق الزين والذوق
اللي مخاواهم يشرف جنابك

سندك واحزامك ليا جيت مزنوق
وعزك قبل مكر الخبول يغدابك

أصدورهم للسر مخبا وصندوق
والكل منهم يحترمك ويهابك

رد: ديوان الشاعر حمدان بن عامر الشكري (ابن مقحــص)
 

(مدري وش أقول )

مدري وش اقول لوطال الحزن فيني
مابين صمتي وتفكيري وآهاتي

ومدري وش اقول لو ضاعت عناويني
ولو طال ليلي ولو طالت مسافاتي

ياليل ياللي على الفرقا تسريني
يا آخر الحلم ياأول متاهاتي

ياراحت البال لو ظلت بي اسنيني
لازلت انا اقوام الاحزان بسكاتي

ياحظ خذني بقايا طيف يحويني
وانا القريب البعيد الناكر لذاتي

خذاني البوح في غبة بحر عيني
وصمتي خذاني على شاطي معاناتي

رد: ديوان الشاعر حمدان بن عامر الشكري (ابن مقحــص)
 

( الربع واجد )

صحيح الربع واجد ياجماعه والرجال أنواع
أحد يفزع معك واحدٍ عليك يشن غاراته

واحد يظهرلك الطيبه ولكنه غشيش أطباع
رفيقٍ بالحكي والناس تعرف ويش غاياته

ابو وجهين له في كل وجه وكل درب إقناع
يبيّن وجهه الطيّب علاك بوقت حاجاته

ويظهر وجهه الثاني ليا منه شراك وباع
يصوب لك سلاحه فالقفا ويسد طعناته

واحد يفديك ويعزك ولاله من وراك أطماع
ولكن الحميه وسط شريانه ونبضاته

ليا منك نخيته قام بالواجب طويل ذراع
ولن ضامك زمانك شفت وقفاته وفزعاته

مثل غيث السحاب اللي هماليله تبل القاع
ربيع الديره إليا حل فيها شفت خيراته

واحد من دون ربعه ينثني فاللازم وفزاع
يشرف لابته ويجمّل أقرابه بوقفاته

على القمه ولايرضا على غير العلا مطلاع
كذا طبعه وذا نهجه مع العالم وعاداته

واحد للهرج وعلوم ألاوادم يصغي وسماع
قضا وقته كذا مابين روحاته وجياته

يغث الكبدويزيدالجروح اللي علاك اوجاع
كلام النم والغيبه علامه من علاماته

يحدك للردا لو ماتباه ولاانت له منصاع
عسى تقصر ليالي عمره الباقي وساعاته

حقيقه ياجماعه شفت بالعالم كثير أنواع
أحد يفزع واحد يضحك معك ويشن غاراته

رد: ديوان الشاعر حمدان بن عامر الشكري (ابن مقحــص)
 

يالله تحفظ بلادي قبلة المسلمين
وترد كيد العدا يارب ف نحورها

وتنصر جنود الوطن وتردهم سالمين
اللي حموا جارهم والدار وثغورها

رد: ديوان الشاعر حمدان بن عامر الشكري (ابن مقحــص)
 

( حلب )
ياحلب منا النصر لاترتجين
والمشاكل جاتنا من كل صوب

ودنا ناقف معك متظامنين
بالسلاح وبالعتاد وبالقلوب

وودنا ناقف معك في كل حين
في زمان السلم والا فالحروب

وودنا عنّك ندافع بس وين
دون نصرك سكرت كل الدروب

العرب ما بينهم متناحرين
كل منهم ولعة ناره شبوب

والعرب حكامهم متخاذلين
للأمانه خاينين وللشعوب

للخيانه في بعضهم جاهزين
بالمساء وبالشروق وبالغروب

وللمشاكل والمصايب صانعين
فالشمال وغرب والا بالجنوب

وللمجوس ولليهود محالفين
لو/دمهم فالعرب دم محسوب

وللعروبه والعرب متنكرين
كنهم سلطه وذنب من الذنوب

ياحلب منا النصر لاترتجين
والفتن متوافده من كل صوب

إدعي الله بالنصر لاتيأسين
وأرسليها للذي هب الهبوب

مالك ألا هو نصير ولك معين
دام دونك سكرت كل الدروب

رد: ديوان الشاعر حمدان بن عامر الشكري (ابن مقحــص)
 

هاذي بيتين أرسلت لي من صديق
وكنت أظن أنها له واتضح لاحقا
أنها ليست له وانما اعجبته ونقلها
وارسلها لي واعجبتي وجاريتها ببعض الابيات
وبعد البحث اتضح أنها لشاعر اسمه
ظيف الله غزاي
والبيتين هي :-

‏الصبر مهما طال ما يلحق مداه
والضيق مهما طال من بعده فرج
ٰ
والحظ لا منه تعثر في خطاه
خل الصبر معكاز والهمه درج

الشاعر/ ظيف الله غزاي

بيتين من جزل المعاني منتقاه
وانا ابجاريها ولاعندي حرج

صحيح بان الصبر ماشيٍن كماه
ويكفيك قول الله عن هارج هرج

في محكم اياته موصيبه وصاه
والله كريم وفي مقاديره فرج

والصبر فالدنيا من الدنيا نجاه
لوالسويّ فيها مايشبه للعرج

والشخص ماله غير ماربه عطاه
مهما ركض فيها ولحصانه سرج

والآدمي مهما تمتع فالحياه
والله00مثل ما جالها منها خرج
حمدان بن مقحص

رد: ديوان الشاعر حمدان بن عامر الشكري (ابن مقحــص)
 

ربعي سليم أهل الفعول الشهيره
مثل النجوم اللامعه في سماها

سِجْل لهم بالمجد ذكرٍ وسيره
بفعول ماتخفا على من قراها

أفخر بهم في كل محفل وديره
وأرفع بهم راسي علو واتباها

رد: ديوان الشاعر حمدان بن عامر الشكري (ابن مقحــص)
 

الليله مباراه في كرة القدم ستقام في لندن بين فريقين سعوديين الأهلي والهلال والتي حجز العديد من الجماهير لحضورها وفي هذه المناسبه فاضت قريحة الشاعر \ اللواء الركن مطلق بن سالم الأزيمع قائد المنطقة الجنوبية سابقا بهذه الأبيات ⬇
مايليق من الحديث الا جميله
ولا يطيب من الفعول الا الجزيله

والمواقف تختلف فيها المواقف
والكلام يعوض عن كثره قليله

هيه يااللي في ثرى لندن لعبتوا
احتفلتوا والله اعلم بالحصيله

ما دريتواعن جبل دخان وينه
وما دريتوا عن رجال فالثويله

الرجال اللي على الحد الجنوبي
الرجال اللي يشيلون الثقيله

جاعلين الروح دون الدين ترخص
والوطن دونه هم سيوف صقيله

والرجال اللي بعال الجو طاروا
يوم طاروا ضيع الخاين دليله

بالنهار وبالليالي ما استراحوا
خلو الحوثي على نار ومليله

والرجال اللي على طول السواحل
ما يعرفون التعب والمستحيله

فارضين الحظر والهمه قويه
ما يجي للخاين المجرم فتيله

يوم بعض الناس همه في فريقه
همنا كيف الوطن همه نزيله
-------------------------
شعر اللواء الركن مطلق الازيمع
مجاراه
أشهد إنه شاعرٍ قال الجزيله
والفظايل تحتسب لاهل الفظيله
شاعرٍ صاغ الجزيل من القوافي
مابحث عن شهرة أعلام وسيله
البطوله في ميادين البطوله
ماهي بكوره ومزمار الفشيله
كم قتيل وكم جريحٍ ينقلونه
ما رضوا للدين والدار الهزيله
والمواقف للرجال اهل المواقف
يوم كلٍ يكشفه دم الفصيله
والوطن مايحتميه ألا رجاله
ماحماه اللي يعرض في شليله
ولاحماه اللي يطول في معمه
ولاحماه اللي لمنديله يشيله
الوطن محمي من الله وجنوده
والوطن واحد ولايوجد بديله
يالازيمع قلت قولٍ ما مثيله
أشهد إنك شاعرٍ مافيك حيله

شعر/حمدان بن عامر بن مقحص

رد: ديوان الشاعر حمدان بن عامر الشكري (ابن مقحــص)
 

نشيل ماشالو هل الطيب ونقوم
من فضل ربي مارجينا الخليقه

في صدورنا ضيم وغرابيل وهموم
ونموت مانبدي على الناس ضيقه
ابو أديب
✨✨✨✨✨✨✨✨✨✨
مساء الخير ع الجميع اسعد الله اوقاتكم هالبيتين نبي لها مجااااره

مساء النور للجميع
مجاراه آمل ان تكون وافيه

لاشك مايلحقكم أقصور ووهوم
وكلٍ مع اهل الطيب يرسم طريقه

والخير والشر للمخاليق مقسوم
والصبر طيب لن بغيت الحقيقه
ابن مقحص

رد: ديوان الشاعر حمدان بن عامر الشكري (ابن مقحــص)
 

( سلام ياموطن )
سلام ياموطن سكنته وعشته
وبداخلي حبه حملته من أسنين

أسمه على صدري كتبت ونقشته
وسام عز وفخر بين الملايين

إليا بغاني درع دونه وبشته
والشعب كله للنداء مستعدين

وسلام ياسلمان والمجد حشته
بالحزم والحكمه وعزم السلاطين

مجد العروبه بعد موته نعشته
ملك حميت الجار والدار والدين

ياموطنٍ ساكن بقلبي وعشته
لك الولا والحب رمز وعناوين

رد: ديوان الشاعر حمدان بن عامر الشكري (ابن مقحــص)
 

( هيئة الترفيه)
تكفون ياولاة ألامر/ وقادة أبلادي
ياللي تقيمون شرع الله والديني

ياللي لكم دور بالاسلام وريادي
ولله / ولمحمد الهادي مطيعيني

تكفون في ديننا لاتعبث أيادي
وتصد عنه إبتفاهات المغويني

الوضع والله غريب ولاهو بعادي
الله يستر من آخر وقتنا الشيني

جانا كوميكون ينشر كل الافسادي
شباب غافل عن الدين ومساكيني

وهيئه ترفه بكفر وشر والحادي
عن شرع ربي وعن دنيه مظليني

يالله يارب ياوالي وياهادي
تحفظ بلادي من أعمال الشياطيني

بجاه عزتك تحفظ حرمة أبلادي
وبجاه عزة نبيك والحرميني

رد: ديوان الشاعر حمدان بن عامر الشكري (ابن مقحــص)
 

( يُمه )
ابكيك يمه وانبرى الحال ونسل
ناذر نذر ماتمر ليله ولا ابكيك
أمر0قبرك 0دونه0السور0مقفل
أمقفلٍ 0يالغاليه 0دون 0غاليك
يُمه 0هنا 0قبرك0ولاعاد0به0حل
وألسور من دونه وانا مااقدر اجيك
على0جداره 0اذرف0الدمع 0واهل
واردد الحسرات0بالجوف0 وارثيك
يُمه مكانك ما احد يسد ويحل
وكل الدموع وحسرتي ماتكفيك
يُمه/ ترى إبنك من عنا دنيته مل
ولاعاد تسوى في عيونه مواطيك
يُمه0ترى0من0دنيتي0ودي0أرحل
واقبلك 0يمه 0واقبل0 اياديك
يُمه رحلتي والحزن عم للكل
والكل بعد إفراقك المر ينعيك
يُمه 0ويايمه0 ويايمه0 يظل
ذكرك على بالي ولاامل طاريك
يالله عساك بجنة الخُلد وبظِل
إبظل سدرٍ والثمر منه يأتيك
واجعل شرابك من عسل صافي يزل
مع سلسبيل الماء وتسنيم يسقيك

رد: ديوان الشاعر حمدان بن عامر الشكري (ابن مقحــص)
 

( سامين الفعال)
يسوقني للمدح سامين الفعال
اللي على الطاله تعد أفعالها
ربعي لهم تقدير مابين الرجال
والناس تعرفعها بطيب اعمالها
قبيلةٍ بين القبايل لايزال
تاريخها محفوظ بين اجيالها
سليم ذرفين اليماني والخصال
اقولها والناس غيري قالها
سليم بالافعال مضرب للمثال
م حدٍ يظام ولايهان أبجالها
أفعال مثبوته ولافيها جدال
وسط الكتب للي يبي يقرالها
مع الرسول إلها مواقيفٍ جلال
في فتح مكه والرجال رجالها
بالفٍ من الفرسان وخيار العيال
بخيولهم والخيل من خيالها
صالوا وجالوا بالرماح وبالسلال
حتى استقر الدين بين جبالها
وعن جارهم مدوا وجادوا بالحَلال
قبل يشب الحرب من يسعالها
صدوا غُزاة الدار عن جار الِحلال
أعيال زعب اللي يشرف جالها
عشر وخمس سنين في حرب وقتال
والحرب فال الله ولاهو فالها
قبيلتي هي محزمي في كل حال
أفخر بها وبطيبها وافعالها
واثني عليها كل ماجالي مجال
لن المدايح والثناء يزهالها

رد: ديوان الشاعر حمدان بن عامر الشكري (ابن مقحــص)
 

م
خاطره بمناسبة الاعلان عن اكبر مدينه ترفيهيه
( مانبي ترفيه )

مانبي مدن إختلاط ومغريات وفوضىه
ماحصل بمحافظة جده بعدها توبه

ولانبي ترفيه يسلب للحيا بعروضه
يجعل أديان العرب وافكارها مضروبه

ولانبي زايد ترف مع مجريات الموضه
العقيده هي زمام أمورنا محسوبه

لجل نحشر مع رسول الله ونارد حوضه
في جنانٍ جعلها من حظنا مكتوبه

والغنا والرقص والله مايورد روضه
مايورّد غير نارٍ لو حديد أتذوبه

يالعل الدار من كل الفتن محفوظه
ومن تقاليدٍ غريبه جاتنا مجلوبه

وياعساها بالمليك ونايبه محظوظه
في زمانٍ فيه نص من الدول منكوبه

يازمان العولمه مدري زمان الفوضه
مانبي ترفيه والراتب يادوبه دوبه

حمدان بن مقحص

رد: ديوان الشاعر حمدان بن عامر الشكري (ابن مقحــص)
 

( سليم العز )
ياهجوس الشعر هاتي للجدادي
في رجال العز والمجد السيادي

الرجال اللي فعايلهم تشرف
في حرور الوقت والا فالبرادي

ربعي اللي كل ما يطري عليه
فعلهم وقت الحرايب والجهادي

يبدع الهاجوس والفكر يتجدد
في مدايحهم بدا والذكر بادي

ربعي إليا حان وقت الجد هبوا
هبةٍ تشهد بها كل العبادي

سطر التاريخ للامجاد فيهم
مجد عز وفخر ماهو مجد عادي

مجد للعليا وفالقمه تربع
من قديم ولايزال ألهم يعادي

منهم الفرسان واصحاب القياده
والرجال اللي تزاحم بالعنادي

ومنهم اهل العلم والذكر المجيدي
سيرةٍ للفكر واصحاب الرشادي

وفيهم اصحاب العقول المستنيره
والهم اشيوخ وقوانين وقوادي

ربعٍ من العز لبسوا كل غالي
فالعصور الباليات وفالجدادي

هم خوالٍ للرسول من العواتك
نصرته واجب عليهم بالوكادي

حافظين الدين موفين الوعودي
وحافظين العهد وحقوق المبادي

هم هل النصره وفعلٍ مايضاها
يوم ناداهم محمد خير هادي

في ظهور الخيل ركبوا كالاسودي
بالف خيلٍ مسرجاتٍ للجهادي

سطروا للمجد تاريخ وبطوله
يوم في مكه لهم نادى المنادي

رافعين الرايه الحمرا ترفرف
راية ارجالٍ هل اسيوفٍ حدادي

في سبيل الله ماتوا واستماتوا
لين قام الدين والاسلام سادي

كم خاضوا من معارك كم سادوا
واحربوا عن جارهم غزو الاعادي

وانكتب تاريخهم فوق الصداره
بالفعول اللي سطرها غير عادي

مجدهم ثابت ولا فيها جدالي
والفعل بين العرب فعلٍ سيادي

للوطن درع وجنودٍ دون حده
يحربون أهل الظلاله والمعادي

وافيين أشبور موفين العهودي
ولاحتما الميقاف بارود وزنادي

شاعرٍ وامدح بربعي واتباها
واذكر افعال القبيله للعبادي

ربعي السلمان مروين الصقايل
ما حداهم عن بلوغ المجد حادي

ذكرهم وسط الكتب ذكرٍ مخلد
ذكر يرفع روس ويكيد الاعادي

ماضي وحاضر يشرف كل واحد
ينتسب لسليم في عَدْ وعدادي

والفعول اكبر من الشعر وحروفه
واكبر من القول لبلوغ المرادي

يشهد التاريخ والعالم شهودي
بالفعول اللي تشرف فالبلادي

مجدهم مثل الجبال الراسياتي
كل يوم وكل عامٍ في أزديادي

بين تاريخ وفعل كل القبايل
سِجّل ودوّن لهم فعلٍ ريادي

حمدان بن مقحص

رد: ديوان الشاعر حمدان بن عامر الشكري (ابن مقحــص)
 

صدري من الشعر وهموم الزمان أرتوا
وايظا من الناس جاني ماكفاني أسا

قلبي جريح وكسير وبالهجر مانوا
صابر وانا اقول ياليت ولعل وعسا

ولو إن صدري من ألضيقه تعب وأكتوا
أقول ضيقة صباحي تنفرج بالمسا

وإنكان غيري لحمله ما استطاع وقوا
أنا تحملت حملي لو زماني قسا

يالله عساني من اللي للجميل إحتوا
ولطيب ربعه ومعروف العرب مانسا

رد: ديوان الشاعر حمدان بن عامر الشكري (ابن مقحــص)
 

ألا يالله إنك لاتخيب رجا الراجين
عبادٍ رجوك ولا رجوا واحدٍ غيرك

لغيرك فلايشكون جور الزمن والدين
ولايطلبون ألا من أفضالك وخيرك

رد: ديوان الشاعر حمدان بن عامر الشكري (ابن مقحــص)
 

( ماطاح قدر الكبير )

ف عيون الايام والا في عيون البشر
ماطاح قدر الكبير ولو تمنا الصغير

والناس فيها معادن خير وجيوش شر
هذاك ميت ضمير وذاك حي الضمير

وان دار وجه الزمان وبان وجه القشر
مدري يعيش الغني والا يعيش الفقير

وإن عودت للثمان اللي منول عشر
يصير شورالعمى من فوق شور البصير

لكن يحيى الذي للعدل أقام ونشر
والله له ألامر بيديه القدر والمصير

حمدان بن مقحص

رد: ديوان الشاعر حمدان بن عامر الشكري (ابن مقحــص)
 

( لوحة تهاني )
طرزي ياحروف شعري وارسمي لوحة تهاني
واكتبي بوح القصايد ياهجوسي واكتبيني

شاعرٍ يعزف من أبحور الشعر لحن واغاني
ومن بساتين الغلا يقطف ورود وياسميني

ينثر احساسه شعر وشعور وحروف ومعاني
عطرها بسمات شوق وفرحه وعيد وحنيني

يهدي من الشوق اريج من الزهر والزعفراني
تنتعش باسما التهاني واسعد اللحظات فيني

تحملة نسمات يوم العيد في ظرف الثواني
لاصدقاي وربعي الغالين في طول السنيني

يالعل العيد عايد والفرح طول الزماني
وياعساكم كل عيد وكل عامٍ سالميني
حمدان بن مقحص

رد: ديوان الشاعر حمدان بن عامر الشكري (ابن مقحــص)
 

( يامشعلين )
يامشعلين من الفتن كل قنديل
تمهلوا لاتكسبون الندامه
الصمت أخير من الحكي والاقاويل
لاصار وإن الرجل يخشى الملامه
الوضع بيدين الرجال المشاكيل
اللي لهم عزه وهيبه وقامه
العارفين العاقلين الحلاحيل
نطاحة الهيه رجال الزعامه
كثر الحكي من غير حكمه وتحليل
مامن وراه الفايده والسلامه
تجنبوا هرجٍ يجي فالتعاليل
ترا الدعاوي بين هامه وهامه
ياللي رميتوا للهدف دون دربيل
ما صبتوا الشاره بذيك العدامه
طيش الرصاص اللي عن الشاره يميل
يمينها ويسارها ياسلامه
ومن شال في وسطه رصاصٍ معاويل
شرهة خويٍ ينقّله في حزامه
ومنهو يدور فالحطام المحاصيل
يبطي مانال المرجله والكرامه
واللي يبي مدحٍ على الحط والشيل
ماهو محصل غير شر وندامه
حمدان بن مقحص

رد: ديوان الشاعر حمدان بن عامر الشكري (ابن مقحــص)
 

أنا سلميّ ألأصل والفرع شكري
إنكان جاء للعلم ناشد وطاري

ربعي لهم مني تحيه وشكري
دام الاسم مع احمر الدم جاري

قبيلتي منها كياني وذكري
أعتز فيها طيب وافخر واماري

بالاسم أنا توجت راسي وفكري
تاج الملوك اللي عليه إعتباري

الشاعر /حمدان بن مقحص

رد: ديوان الشاعر حمدان بن عامر الشكري (ابن مقحــص)
 

أكبر من الحب صاحب تكبر بعينه
واعذب من الشوق خلٍ تنتظر شوفه

واقسى من الظلم سيف البعد وسنينه
وألا مشاعر حبيبٍ تحترق جوفه
حمدان بن مقحص

رد: ديوان الشاعر حمدان بن عامر الشكري (ابن مقحــص)
 

( ابراهيم الفخر)

بسم إلإله اللي عليه ألأتكال
اللي نعبده مانعبد أحدٍ سواه

الواحد الفرد القويّ وذو الجلال
ربٍ تعلا ثم تجلا في عُلاه

الخالق اللي نطلبه في كل حال
والواحد اللي مالنا عنّه غناه

اللي خلق خلقه وفرّق فالرجال
أحدٍ دني واحدٍ رفيعٍ مستواه

من بعدها ياهاجسي هات الجزال
مادام لي مقصد وهذا مبتداه

أبمدح اللي يستحق بلا جدال
اللي تعلا ذروة المجد ورقاه

اللي يرد للجم بطوال الحبال
ماتقصر حباله عن الجم وعذاه

رجل المواقف والمهمات الثقال
طيّب وعلم الطيب مايصعب علاه

رجلٍ يعانق في شموخه للجبال
راعي جميل ولايخذل اللي نصاه

رجلٍ تسلسل من كريمين السبال
من آل عمر الفرع سفياني نباه

أبو يزيد اللي يعادلّه رجال
بالطيب والمعروف مايلحق مداه

يقدم ولابه شي عنده مستحال
كريم متواضع وشهمٍ في أخوياه

مدير لاكنه وزيرٍ بالفعال
المنصب اللي يشغله فعلا زهاه

أنشهد إنه للوفا مضرب مثال
كل العلوم الغانمه من مستواه

وانشهد إنه عد هداج الزلال
مانقّص الغراف والشراب ماه

وانشهد إنه من كريمين الخصال
كاسب علوم الطيب من جده واباه

هذه براهيم الفخر صدر الشمال
اللي بفعله كل تقديرٍ جناه

رجلٍ يشرف لابته في كل حال
وأنا أتشرف فيه واسعد في لقاه

وأرفع له البيضا على روس الطوال
من زود تقديره ومن زايد غلاه

واختامها عذراً على قصر المقال
لنك تفوق المدح من كل إتجاه