منتدى سليم - مساجله من نوع آخر

مقدمه
تمت هذه المساجله عن طريق رسائل الجوال علما بان الشاعر عبدالعالي النجاري ابو طلال لم يكن يعرف
رقم جوالي في حينه اتمنى لكم قضاء وقت ممتع ومثير

(هاوي الود).. ياذيب وقف مكانك وش الذيب
قدام مرهبة السباع الضواري

القصر شامخ مابه ايا عذاريب
ساسه جويد وماش حوله مباري

(ابو طلال).. من لايهاب الذيب ماهابه الذيب
ياذر مايذكر بغير الغفاري
كل(ن)على صيده يسن النواشيب
والحر قوته من قلوب الحباري

(هاوي الود).. الشمس لن غابت تراها باسابيب
وماهو اكيد إنه عُقبها نهاري
هذي حقيقه تبعد الشك والريب
تنصى الفهيم اللي عن الوضع داري

(ابو طلال).. شمس الخديد اللي لنا شوفها عيد
والناس تلعن شمسها فالضهاري
للموت حيه داخل القلب متغيب
عهدي لها محفوظ داير مداري

(هاوي الود)..سلم عليهم عاشقين المراقيب
وما كل مرقاب(ن)تجي فيه ناري
انا خفوقي ذاق مر التجاريب
والحاصل انه تالي الوقت خاري
ياخيّ مالي في وصالك مطاليب
ماغير شوق(ن) راح يمك وغاري
انته بعيد هناك يااغلى الاقاريب
متى اشوفك يم بيتي وداري

(ابو طلال)..حيرتني بين الهوى والاصاحيب
هقوى سرابي يم هاك البراري
تكفى تراني مااتحمل تصاويب
حدد مسارك ياسهيل السواري

(هاوي الود)..انا ابيك تودي بعيد وتجيب
وتحير مابين الكسى والعواري
هاذي طبيعة صاحبك راعي الطيب
مير الصبر من شان ريم العذاري

(ابو طلال)..ريم العذارى لحالها والهناديب
في حالهنا ما يصلنه حذاري
والله ماانسى ود جنابة العيب
مهما بدالي من جميل المواري

(هاوي الود)..ريم العذارى جالها منك تعذيب
ابكيتها ياصاحبي وانت داري
ياكيف ترميها لسود الخواطيب
وانت الحبيب اللي على الوصل ضاري

(ابوطلال)..اسالك باللي لبسك حلة الطيب
انك تصارح لاتزود مراري
ان كان لي عندك معزه وترحيب
ماظن ترضى لي فضيحة ستاري

(هاوي الود)..العمر باول واكتسى الراس بالشيب
كله بسبة شوفتي للدياري
شوفة منازلها تشب اللواهيب
وتكدر الخاطر بدمع العباري
وش رايك نطول دروب التعاذيب
انته وانا مابين بايع وشاري
انته تريد الفوز بارض المعازيب
وانا بعمري مارحمت المباري

(ابو طلال)..سد الجواب ولاتردك عواقيب
ادعس وبادعس دامها بالتباري
صدام جمسك دهنه بأطيب الطيب
واقدم وقدامك صليب الصواري

(هاوي الود)..الوعد بكره يم روس المشاهيب
لاياصحيبي يم كيف البهاري
طرقتك هذي عدها للتجاريب
والمقبل احسبله قصاص(ن) وثاري

(ابو طلال)..يامرحبا باللي لنا وجه الجيب
يبشر بعزه صاحبي في جواري
الله يجازي موقف الامس ياذيب
خلى يميني في مكانة يساري
راسي ولاني من خفاف المحاسيب
لاكن عزاي انك لجنبي مداري

استمرت المساجله بعد ذالك لعدة ايام ولاكن

للأسف لا تحظرني ابياتها

وسلامتكم