منتدى سليم - قصيدة مزحم بن منيع الله القاضي ابن ثعلي (رحمه الله)

أول ذكرت الله مبادي إكلماتي
هو واحدٍ مامعه في الملك أشاريك

والثانية على نبيي صلاتي
ذكره يصفي القلب عن كل تشكيك

أوصيك يافراج وأحفظ وصاتي
أن كان قلبك فاهم يوم أوصيك

خلك على ماقال راع الرواتي
قل خير وألا أصمت على كل مافيك

واحفظ صيامك واجتهد فالصلاتي
تراك لابد أملك الموت ياتيك

لو أن برّق لك طويل الحياتي
تدور دورات الهجر لين تفنيك
سواة منهو في بعيد النحاتي
ويمك تقربه الخطا لين يمسيك

وياخو منيره محتم الجاذياتي
خلك طويلات العلالي مباديك

مبداك خلّه في حجا النّايفاتي
لاترتخي في منزحٍ ثم يرخيك

من خوف يحكيبك خطات الحكاتي
وأنا على الربع المناعير عازيك

وان شفت الأرياء عنك متحادياتي
عيبٍ ليا ناويت من لايناويك

وادر أن مافي تبع غيرك قداتي
خلك على رايك ورايك يكفيك

واحذر ضعونك تتبع المقفياتي
ترا أن تبعك للمقفي يعنيك
لايسحبونك مثل سمل العباتي
افهم تراء تبع الرجاجيل فاديك

يلعبك المقفي وتغدي شتاتي
وان جيت والا رحت ماهو مراعيك

والمال ضمّه واجتهد ياشفاتي
زال الشباب وشبّت العمر معطيك

زال الجهد والعمر فيه إجهلاتي
أينك لياماشبت ماعاد يمديك

أجر وجميل وفيه ستر وغناتي
سترٍ عن اللي مايودك ويغنيك

ودنياك للفاهم تراء الها طراتي
بيتٍ على كل المباني يشمقيك

مبني وراعيته من الخيراتي
ماهيب شنوا كل يومٍ تشانيك

الثانية معنى يشوق البداتي
يفرح به المضرم ليا جاك ناصيك

صبح(ن) على جال المناره خواتي
ونجرٍ عويله كان صوته يناديك

وحومة بلاد تشبّع الجايعاتي
تزها النظر من مال فيها يهنّيك

والثالثه من جيد الموجفاتي
عوصاً عن اللال المدارك تنجّيك

كيعانها عن زورها مبعداتي
وان عفت من حالٍ تبعّد مماسيك
والرابعة من جيد المنكراتي
مسلوبةٍ تلطم بها اللي يعاديك
أن جاء من الأجناب رد البراتي
تلطم بها العايل وهي من شواريك

واليا عطاك الله من الجيداتي
حافظ عليها لو قلّت مواشيك

ترا العزاله من حساب البناتي
ماهوب في عسرات الأيام شافيك

واحتس ولو ان الهجر مسلماتي
من خوف يكسبها أقشرٍ ثم تضويك

وهيه تجي في غفلةٍ وابغتاتي
ودنياك عن غيباتها ويش يدريك

وان جوك هشّال الليال المشاتي
توصّ باللي طامعٍ بالعشاء فيك

لو كان ماتدري من أي الجهاتي
الضيف اله حقٍ من الرب واطيك
بردان جوعانٍ بحاله شماتي
ملحوق لو يسكت تراه متباطيك
ذرّه وعشّه وافعل أحسن سواتي
خلّه ليا ماراح بالخير يدعيك

ومن أله عندك مطلباً بالثباتي
سدّه وغلّق مطلبه قبل يشكيك

حتى دعاويكم تجي ساهلاتي
واليا شكيت العسر تطلب ويعطيك

وادخيلك أقصر عنه رمح العياتي
واللي مايوحي فهّمه لين يوحيك

وان جاك نصّابٍ عن الحق عاتي
شرّف عليه المشرفه لين يبليك

ثم انطحه باللي تجيب الوفاتي
وأغلظ عليه ولا تحسّب قوافيك

رأسه وسلّة ساطي المرهفاتي
أن كان قلبك ساطي الخلب تكفيك

وتريعه للحق عند القضاتي
وتذكر اللي عقبها طامعٍ فيك

تراي بيّنت الك كل معناتي
واما لزمت أوصايتي وين أوديك

صح لسان ابن ثعلي شاعر جزلة ووصاية رايعه عليها تربى الاجداد

وحافظوا على معانيها الجميلة

شكرا لك على النقل الاكثر من رايع

وتقبل مروري وتقديري