منتدى سليم - عشق الغيم ،، قصيدة و ردّ

منتدى سليم (http://www.solaim.com/vb/index.php)

- روائع الشعر الشعبي (http://www.solaim.com/vb/forumdisplay.php?f=40)

- - عشق الغيم ،، قصيدة و ردّ (http://www.solaim.com/vb/showthread.php?t=31294)

عشق الغيم ،، قصيدة و ردّ

فهد بن محمد
شاعر من سدير
عرفته من خلال منتدى ارتاده

بيننا صلة شعر وصلة صداقة

وجه أبيات لغرضٍ مـــا ، وذكرني في قصيدته التالية:

قصيدة الشاعر فهد بن محمد:

يا خوي الليل ياللي ضيع البارح خويه
..................... وجاء يدور ليلته لاهو لقاه ولالقاها

لا تخليني اجر طروق غير الاوليه
.................... ولا تخليني احول للقصايد من سماها

واكتب بيوت تشابه للبيوت الجابريه
................. شاعر الغيم ان كتبها جابها لآخر مداها

الشعر يحتاج بذره ترتوي بالعبقريه
.................... فكرته لاحلقت يستاسع لعينك فضاها

الشعر ماهوببسطه في ظلال القيصريه
............... من بغى خمشة شعر مر المعلم واشتراها

الشعرلاجاء احس باختلال الجاذبيه
........... كني ارقى شوي فوق الارض واغادرثراها

وتشعر بحاله غريبه ما تفسّر داخليه
................ تنقلك من مرحله لاخرى تشابهها وراها

تمررك بين المناطق لمنطقه لا منطقيه
................... لا توقف او يغرك عند هالنقطه دفاها

روح لين انك توسط للحروف الابجديه
........................ خلها تلتف بك من الفها الين ياها

واعزف النغمه ولكن خلها نغمه شجيه
.............. وانتبه تغتر لحظه وانت تعزف اوتباهى

من هنا شوف الحروف اللي من اول دايريه
............ رح تشكل لك صور تستمتع عيون ٍتراها

التقط ماتلتقط منها لْصورك الشاعريه
............ واعرف الرحله هنا وصلت معاك لمنتهاها

وجاء ردي له بهذه الأبيات ، أرجو ان تنال القصيدتين جزءا من استحسانكم

،،،
الليالي طبعها تنسيك شي مْن الاذية
قوم شب النارلين يصير فالعالي سناها

صاحبي ماملـت الاقلام في يوم وعشيه
ولا يشم الورده الا من عرف طيّب شذاها

انتبه! بعض المواقف تعتبر ذا الوقت سيّه
لا تجر الصوت ثم تزول أرض وماطحاها

خل عينك فالسما يمّ الغيوم العقربيه
كل ما هزيت غيمه من قصيد يسيل ماها

لين يخْضِر كل حقلٍ مسقويْه وعثّريه
والحروف تصير خضرا يانعة كامل بهاها

لا تذكّرني سحاب الوسم بعد ابطى عليه
يوم اخيّل بارقه يشلع عروقي من حشاها

كنت راعي للغنم والإبل في أرضٍ خليّه
آآآآآآآآآآه يا شح الحروف اللي تعبر عن غلاها

يا فهد والله كِبِرت وباقية نفسي طريّه
طفل لو مرت به الغيمة ولا سالت ،بكاها

لجل هذا صرت شاعر صار عشق الغيم فيه
المهم السالفه(عشرة عمر ) قلبي رضاهــا

وسلامتكم