منتدى سليم - ستون عام على النكبه

قصيدة الشاعر : ظـافـر فـالـح عمار القويعي

ذيب ياللي في ظلام الليل جريت القنيــــــــــب
كن حسّك في حشايه يوم فالمرقب عـويـــــــــت

أنت مخطي لك فريسة رحت عنها مستصيـــب
أسلمك ربي بعد صوبت وأنصبت ونجيــــــــت

ميرأنا يا ذيب بي جرح ٍعجزعنه الـطـبيــــــب
حدني بوحه لذا المرقب وأنا يا ذيب جيــــــــت

أجتمعنا وش جمعنا غير يا ذيب النصيـــــــــب
حدني للبرد وانته مثل صاحبك انحديـــــــــــت

جرحي اللي له سنين فالحشى عيا يطيــــــــــب
بريت جروح البرايا غير أنا اللي مابريــــــــت

ماني بشاعر توجد من وجع فرقى الحبيـــــــب
و لاخسارة سوق الأسهم فيه مابعت وشريــــت

فوق ست عقود والمسرى من الأمة سليــــــــب
والمآسي والمعاصي عندنا في كل بيـــــــــــت

مسجد الأقصى يعيش اليوم في ظرفٍ عصيـب
كل ما شفته توجت وعلى حاله بكيــــــــــــــــت

كيف أبضحك واتهنى والحشى وسطه لهيــــب
واللهيب أحرق حشاي ومنه فالكبد أنكـويــــــت

وحال الأمه حال يرثى له ويبكى له صعيــــب
ثار الأمة مايحركهم ولو فيهـم نخيــــــــــــــــت

دوبهم فابن المهلهل يأخذ الثار لكليــــــــــــــب
أو مبارات القدم للمنتخب ضد الكويــــــــــــــت

وفي فلسطين العباد تعيش في وضع ٍ رهيــــب
بين ضرب وبين حرب وجوع وحصار ٍمميـت

الصغير يموت مـا يلقى فـصـدر أمـه حـليـــب
والكبير يموت مـا يـلـقـى طــعــام ٍ لـه يـقـيـــت

حالهم من الوليد فيومه الأول يشيــــــــــــــب
بين قصف الطايرات وبين نسف الـدينـمـيـــــت

وأعظم من اللي سبق يوم إن عباد الصليـــــب
ولعوا للحرب نار وزودوا للنار زيــــــــــت

يوم بندكت السادس عشر يطعن و يشتم فالحبيب
ويتطاول ويتمادي وينعته نعتٍ مقــــيــــــــــــت

يا فلسطن أبشري والنصر بإذن الله قريـــــب
و أصرخي بالصوت يمكـنّـك تلمين الشـتـيــــت

وين خالد والمثنى وطارق كعام الحريـــــــــب
والرجال اللي لهم فالحرب تـاريـخ ٍ وصيــــــــت

ويا صلاح الدين ليتك حي نزهمك وتجيـــــب
وليت (.......) مكانك يا صلاح الـديـن مـيـــت

ما نظمت الشعر ادور مال والمولى رقـيــــب
وتعرفون إني ورا والشـهــرة فعمري ماسعيـت

كان شعـري مـا يـحـرك حـس شبان ٍوشـيـــب
والله أنـه صــدق يـا أبو زيـد كنـك مـا غــزيـت.