منتدى سليم - الشاعر علي بن حمري

قصيده أقل مانقول عنها إبداع في إبداع مضمونها عن أحوال الدنيا والأخوه في زمن تلاشت فيه الأخوه .. الشاعرعلي بن حمري الحبابي .. أتمنى تعجبكم :

ياربـي تسهـل الأمـر وتزيـن الأحـوال
ترانـا بـلا رحمتـك هلكـا ومتهـاويـن

ولا عندنا غيرك ليا صـك جـال ٍ جـال
ضعـوف الأوادم ياقـوي فيـك متقويـن

أبي رحمتك حي .. وفـي القبـر والأهـوال
نهار الحسـاب مشيّـب الرضّـع الولديـن

لنا حقوق وعلينا حقـوق وماحـط يشـال
زمـان يخلـي ضاحكينـه مـن الباكيـن

ماينزل بـه الراحـل ويرحـل بـه النـزال
ومواعيدنـا وآجالنـا كـل شـي بحيـن

فياحـظ مـن طابـت فعايلـه والأعمـال
وياشين حـظ اللـي لا وحـده ولا ثنتيـن

هبوب الزمـان وكنتـه والبـراد أشكـال
تقلب بـه الدنيـا وأهلهـا علـى الجنبيـن

ولا أصعب على الصاحين من كثرة الجهـال
ولا أقسى على الجهال من سطوة الصاحيـن

عسى الله يصيب مـدوّر الشـر بالسـلال
وعسانـا لا ظّـلام ولا حـن بمظلومـيـن

ولا نطـرد المقفـي ولا نكـره الأقـبـال
ولا نخطـي ليـا صـار مانقبـل المخطيـن

لو أنهـم تناسـوا فعلنـا مانقـص مثقـال
من اللي تناسـوا جعلهـم دايـم ٍ ناسيـن

ولا تذكرونـا غيـر فـي حـزة الأنكـال
ليا أشتدت الأزمه وخالط صفا المـاء طيـن

نطب الخطر والخوف والموت طـب هبـال
تقـول إننـا بمقابـل المـوت مستـريـن

بنفنـى وتفنـى عيالنـا بـس لا نــزال
عزاز النفـوس اللـي علـى حقنـا عييـن

على الراس كوفيـه ومـن فوقهـا دسمـال
ومـن دسمالـي عقـال ٍ يمـيـل يمـيـن

ولـو ماتحـوش أيماننـا مـال مانهـتـال
لو الوقت عاري وجه .. عشناه مستوريـن

أبو خمسه لا قـل مـن قيمـة أبـو ريـال
فبو نصف يقدر يقتل أحـلام أبـو قرشيـن

مايوجعك يالسائل سـوا جفـوة السـؤال
ليا صرت تقضي دين ظهرك .. بمثلـه ديـن

ولا فيه بيت ٍ سالم ٍ مـن بعـض الأشكـال
وهدامتـه قلـه .. وبنايـتـه كثيـريـن

لنا ماضي وحاظر ومانبكي علـى الأطـلال
مايبكي على الأطـلال ياكـود محروميـن

لهم ماضي ٍ حلوى لكـن حاظـر ٍ بطّـال
وذولا عرب موتـى ولـو عادهـم حييـن

تقـل العوايـد يـوم تتعاقـب الأجيـال
وسلوم الرجـال الأولـه تتعـب التاليـن

ولو نذكـر اللـي راح ياويـل حـال وال
بعـد روحـوا شيباننـا الزحـل الوافيـن

موصيننا بالصـدق فـي القـول والأفعـال
وفي جمعـة ٍ تهتـاب مـن قوّهـا الطمعيـن

غدينا شتات وحن عيـال ٍ علـى رجـال
رخصنا والأجناب أصبحوا عندنـا غاليـن

نحب الجمـل والحمـل ونعـذرب الجمـال
وهو اللي يقود الزمل من ويـن إليـا ليـن

مـن أول يـوم القـل والمـال ماينطـال
قبل شركة الكهرب تنـور بيـوت الطيـن

يوم إن الرفيق أغلى مـن الـروح والمنـزال
ويوم إن الرفيق إن غاب نفقده فقـد ٍ شيـن

وذا الحين الأخ يقاطع أخوه حيـل وحـال
ولـو حستـه الأيـام ولا غـراب البيـن

أخوي إبن أبوي إن كان مايـردع العيّـال
إليا عال فيني رحت به فـي سنـد الأثنيـن

أبيعه كـذا وأشـرب ورا بيعتـه فنجـال
وأنا دون عمري قبل يولـد إلـى ذا الحيـن

جروح العرب تبرى .. وجرح الأخو قتـال
وجرح العرب واحد .. وجرح الأخو جرحين

ولـو يبتلـى والله ماخليـه ليـن يـهـال
علي القبر ولا أنتصـر لـه مـن الغاويـن

يقولون جيبـك أكبـر أخوانـك العقـال
وأنا أقول وقفة الأخ تسوى كنـوز الصيـن

عطاني الزمن كل شـي إلا مـره وأطفـال
عسى الله يكمل زينتـي فـي الحيـاة آميـن

لا تحزن ولا تزعـل تماسـك وهـد البـال
ترى العاقل اللي يحسب حساب وقته زيـن

رفيقك تحمل له ثـلاث ولا شـك ثقـال
لكن رابعته أفطن لها وأخـذ حـق وديـن

والأولاد وهبـه لا عمـام ٍ ولا بـخـوال
عسى الله يصلـح ماعطانـا مـن الجنسيـن

ياكم بنت خامل جا ولدها بطـل الأبطـال
وكم بنت شيخ ٍ جا ولدهـا قصيـر يديـن

زكـاة العـوال معاكستهـا زكـاة المـال
لاطاب لك واحد فأدفن عوالـك الباقييـن