غصن الغلا
[poem=font=",6,royalblue,normal,normal" bkcolor="transparent" bkimage="" border="none,4," type=2 line=0 align=center use=ex num="0,black""]
على خط جسر بقيق مريت جسر بقيـق=وأنا غترتي من فوق راسـي ورابطهـا
دوي الرعد في أذني دوي طايرات الميق=أبـي ديـرةٍ مانـي بجاهـل خرايطهـا
على شان من يحلم بزولي قبل ما يفيـق=وإذا فاق ذاكرتـه علـى الحلـم سلطهـا
معاه العذارى لو تهايـط مسـا وشريـق=علي من غلاه إن قـد يوقّـف مهايطهـا
عليه الوصوف النـادرة راكبـة وتليـق=تحوطـه مـن زود الميانـة وحوطـهـا
كساير ذهبه اللي لها في النحـر تبريـق=تغبطه علـى منحـره والنحـر غابطهـا
يا غصن الغـلا يالله بالخيـر والتوفيـق=تبا تغنـم الفرصـة معـاي أو تفرطهـا
جدايله ما تدري وش المشط يابن زريـق=تعرض على شهب الهبـوب وتمشطهـا
أبسمعـك بيتيـن مـا هـي بللتلفـيـق=وبيتين تصلـح لـك وبيتيـن سافطهـا
وبيتين يلحقهـا مـن المنتقـد تحقيـق=وبيتـيـن ماتعجـبـك ولا تعابـطـهـا
ألذ الوصال مواصلك وأحلـى مـا ذيـق=عسل نحلتـه شفتـك والثغـر مسقطهـا
غرامك غصن جمره يفوح عليـه بريـق=رفق على كبدي تـرى البعـد شاحطهـا
تخبر الدموع اللي سرت من عيونك ضيق=قاهـا هـدب عينـي حزينـة وقلطهـا
وقامت تجمع من على محجـري وتويـق=وإذا حولـت مـا عـاد يمديـه يلقطهـا
لكن ماعليها خوف خلق الدمـوع تريـق=خدودي لدمـعٍ مـن سبايبـك باسطهـا
صغاير الأمور أشلهـا والكتـوف تطيـق=وعظايـم الأمـور تهزنـي وأتباسطهـا
وأنا ما علي من شلة الضحك والتعليـق=أعرف الخيول النـادرة مـن مرابطهـا
وأدوّر على الجزلة ولو إنها براس طويق=وضعاف النفوس الله من الأرض يسخطها
أبي شوفتك من دون موعـد ولاتنسيـق=لو إنك ما بين أقوى الرياجيل وأنشطهـا
عذاب الممات مـن التوجّـاد والتفريـق=ولذيذه ما بين أطراف كبـدك وواسطهـا
لو أحملك ذنبي خطـا يـا لذيـذ الريـق=أنا قبل أعرفك رايحٍ فـي خرايطهـا[/poem]
التعديل الأخير تم بواسطة سيف الدين القنبي ; 07-16-2010 الساعة 03:44 PM
سبب آخر: تعديل العنوان
|