طاروق راااااااااااائع احببت أن انقله لكم

صقرسليم

على أقمار الفضاء مستور شاعر واكب التطوير
مسافات الفضـاء والموهبـه ماحـد ٍ يحددهـا
منول راس ماله مزودة تمـر وسمـن وبعيـر
وهالحينـه يجمـع فـي حساباتـه ويرصدهـا

مستور السفياني
على هونك ياصقر سليم فكر واحسن التدبير
وخل البل تارد يالبقيلي في مواردها
ترى ماهي غريبة للذي ينوي طريق الخير
وكم من واحدٍ له نيةٍ نجهل مقاصدها


صقرسليم
تراني ماهرجت الا بعد ركزت بالتفكير
أنقد كلمتي قدام احـد غيـري ينقدهـا
وبرمودا مثلث فيه مخ اهل العقول يحير
تمره طائرات الجو ماترجـع قواعدهـا


مستور السفياني

ترى مافيه كامل وانت لا تعكس طريق السير
ولله الكمال وكل سابق تطـــــــــــــلع بيدها
وصاة كليب في حرب البسوس أعمت عيون الزير
وجســـــــــاس اشعل الفتنه بحربة جاك جاردها

صقرسليم

ماتدري وش مصير المسلم اللي ياكل الخنزير
يضّعف غيرتـه فالديـن وعزومـه يبردهـا
وصاة أمير كاتبها بدمـه واستلمهـا أميـر
سبايبها مره واجيوش تغلب مـن يجاهدهـا


مستور السفياني

ودهن العود مايؤخذ من اللي ينفخون الكير
وخّدام الكنايس مايصــــلى في معابدها
بعد كسر العظام السالمه ماينفع التجبير
وياضعف اليدين اللي تكّسر في سواعدها

صقرسليم

اخذ علمي ترى شمس الحقيقه صابها تكوير
ماباقي غير قوم الكهف تصحى من مراقدها
مايقبل راعي الذمه شهادة شاهـد التزويـر
شهاده باطلـه ملعـون قابلهـا وشاهدهـا

مستورالسفياني

جبال طويق صورها المصّور وأحسن التصوير
ومعروضه على الشاشات والعالم تشــــــــاهدها
تبى تخفي الحقيقة والحقيقة عند شيخ مطير
ولا ياصاحبي صقر البقيلي ليش جاحدها