مساء / صباح

الخيرات والمسرات



متوآضعه عسى ان تنال الاعجاب



[poem=font=",6,darkblue,bold,normal" bkcolor="transparent" bkimage="" border="none,4," type=2 line=0 align=center use=ex num="0,black""]
داج الفكر وسط الخيال اللي عوت دونه ذياب=مع هأجسن لاصاب صعب دواه قدام الطبيب
بيني وبينه تكفخ الأفكار في عين الصواب=وتعرض علي الغآيبه والمستحيله تستجيب
لاطاع طوقته ولبسته من الراس الثياب=ورفعت قدره عن طمين الهرج والعلم المعيب
ولازان غنيته وقمت أرفع مقامه للسحاب=حتى ليا أرعد ينهمل نوه على ذهن اللبيب
واليوم أغنيبه وأفل القاف والمعنى جواب=عند الجفونه كاسبين الاوله عوق الحريب
يامرحبا باللي حضر ترحيب من روس الذياب=مسيوق من بين الضلوع العوج والصدر الرحيب
العيد يامعيد من العام القديم اليوم طاب=عود قبل ينعاد وقته فالسنه عقب المغيب
نجدد الترحيب والمكنون عنوان الكتاب=ويسابق الترحيب ريح العود فالحفل الرهيب
ذا الليل دام الله جمعنا صدر وصدورن رحاب=على الفرح والطيب والتوحيد والرأي الصليب
أستاذن الحضار أبفتحلي على المكنون باب=دام التناقش وإحترام الرأي مذهب للعريب
يالواقع الملموس والمدسوس قدام الحجاب=مكشوف سرك في حدود الدايره والله رقيب
وش عاد باقي فيك ما طوق عليه الأكتئاب=حنا نعيبك والعلوم الصادقه فينا تعيب
إحكم على اللي في عيون الناس من دونه ضباب=وعطنا من اللي فوق كفك رآوده شكن وريب
حبل الرجا مقطوع والعالم ضحيه للخراب=وأسياد يعرب فالشدايد لاتحرى وش تجيب
القلب يهتف والحشود جنود والعلم إضطراب=شوف الذياب اللي لها في عالي المرقب قنيب
حرائر الثوار ما حطوا على العرش إنتخاب=والشمس مايخفي لواهب قيضها كود المغيب
سيف الحكي مسلول عند الناس والمطلوب غاب=بالله قلي كيف يبرى واهج الجرح ويطيب
اليوم لاتنشد عن الماضي حضوره ويش جاب=مدام راسك من صروف الوقت غطاه المشيب
تاريخنا من صنع ماضينا وحاضرنا سراب=وأفعالنا لحفادنا وآقع يعاب ويستعيب
أمسى تطورنا على الأمجاد وحلول الصعاب=وأصبح على التغيير والموضه من العهد القريب
نمشي مع الايام ماندري عن دروب الذهاب=وأيامنا لوهامنا دربن يودي مايجيب
ياللي تجيد الهرج والدرب المودي والاياب=عطنا من المشهود ماعينت في دربك ذهيب
ياللي تعلكون التسيس بين ضرس وبين ناب=داخل نطاق الفلسفه والهرج فالوقت الخصيب
لادق عودن عود والواقع حصل فيه إشتباب=في واضح الصوره يبين اللي كلامه مايصيب
كم حر لابان النكد يوم الهدد عود غراب=وأهل الهياط هياطهم مافاد فاليوم الصعيب
نكبة بني يعرب على المعتاد والشاهد جواب=ثلاثه وستين عامن والتسيد للمهيب
المعذره ياقدس مانقدر على جيش المهاب=مدري جبن والأ كذا لاهين والدعوه نصيب
الناس تآحي لاكن المكبوت صوته مايجاب=كن الخطا بعيوننا من كثر ماشفنا صويب

واليوم شفنا في محيطات الفتن شيب وشباب=نطفح ولا أدري وش تجيب أيامنا والله حسيب
أستوطن العصيان بقلوب البشر والظن خاب=يالله ترحمنا وتكفينا عذابك يامجيب
حتى نواهي ديننا يالله تكافينا العذاب=حرامها حلل على المكشوف بلسان الخطيب
ماعاد باقي مستقيمن ماحصل فيه إنحداب=زاد التخلف والجهل نوه على العالم صبيب
مد النظر فيما عطاه الله وبادر بالجواب=شوف المزاين سوقها ماصدقه عقلن لبي
نلعب على كف الفخم والعمر تاليه الحساب=مما نشوف من الفتن يالله عفوك يامثيب
لاكن لو إن الشعر يبري من الأمه مصاب=لسبح بحوره وأجلب اللي ما أنجلب واهل صيب
قم يافهد مما لهد بالمجتمع شد الركاب=نعم الصحيب اللي يبيع العمر من شان الصحيب
خوتك مكسب ياطويل العمر سيفي والنصاب=ودرعن ليآ جار الزمن وأشتد من جوره لهيب
البارحه من جاير الهوجاس طبقت الزهاب=ممآ يلوح بناظري دمعي على الغصن الرطيب
قامت تلج رعود فكري في مهمات الغياب=وعيني عليها يافهد ماكنها ألا عين ذيب
الله يستر من عواقبها على سطح التراب=مايطرح الرجال كود الهم والجرح العطيب
مابين مسموم إبرة العقرب ولدغة ناب داب=حبل الأمل يخلق ويرسم بسمة الحر التعيب
بعد الصبر لابد مايفتح على المطلوب باب=بأمر المجيب اللي دعا العبد يمه مايخيب
ماجور ياحالن تردى عقب ماناش السحاب=نازل كما ينزل هميل الماء على كف الشعيب
لاعادك الله ياخيالن نقض جروحن عطاب=درج وفارقني من الأوهام والليل الكئيب
أتعبت رجلي في طويلات النوايف والهضاب=وتعبت من دوس الظلام اللي هجوسه ماتغيب
كم ليل أجر الصوت فالقمه ولاحولي مجاب=والنار تاكل فالحطب والناس مسمعها سريب
أنطقت من هول الزمن نزف المشاعر والمصاب=لاكن من يصغي ويندب لي لمطلوبي نديب
لاوالله ألاضاع والشاهر على حد الرقاب=ماعاد يمدي نربط السبحه ونفزع للصويب
ماجور ياحال العروبه في ضجيج الانقلاب=صار التشتت في جنابك للملآ ماهو غريب
ماجور ياحالن تردى عقب ماناش السحاب=نازل كما ينزل هميل الماء على كف الشعيب[/poem]


علي بن معلي الدملوكي

__________________
شــاعــر حــزيــن وراس مــالــي كــذا جـــرح
.. أكــتــب هــنــا مــن نـــزف جــرحـي ( قصأيد ) !