طالع ونازل
قصيدة للأستاذ مقبول مبارك العرابي 21-11-1433هـ
1- لقيت طاير مبتلش في طاير = أسفل جبل راسه وكور صقور
2- وفزعت أبى أفك النشب واستوضح = وياسرع ما التمت عليً طيور
3- من كل نوع طْيور منها مْزوًل = ومنها طبيعي ما ادعى بالزور
4- ذولا تبى تفتك هذا وترفعه = راس الجبل في وكره المشهور
5- من طيحته من خيبته من رفاقته = كل الحرار وماكره مقهور
6- وذولا يشدونه حدر مع زعيمهم = وجنبتهم فالحال بالباكور
7- وجنبت بالمبلوش واللي مبالشه = وقلت اهدوا اهدوا والصدور تفور
8- ومن ونة المبلوش ونيت ونة = ماني على زفراتها مجبور
9- يقول يامقبول ماشفت يكفي = والله لو تدري عن المستور
10- قلت اسمك أيش وقال أنا الحر طالع = وأنا على كل الحرار غيور
11- إن شفت فرخ لوكر عزه تنكر = من عقب طاح أستنكر المنكور
12- أحميه من عيش الرخم والنعامة = ولبس الغراب وزاده المخبور
13- قلت وْنعم ياحر وكره يشرفه = وفي كل ماقف عز دوم يدور
14- ثم قلت يا البلاش قل لي وش اسمك = شكلك مزول والوسم مغفور
15- قال إن بغيت الاسم فالاسم نازل = واما الوسم ماله بجيلي دور
16- حنا نزلنا سوق ماهو بسوقكم = ريش الحرار بساحته منثور
17- حنا وردنا العولمة وارتوينا = وكل(ن)بها وبلبوسها فخور
18- لبس التقدم والحضارة لباسنا = وش فيه لو قلتوا عرا وسْفور
19- إن طاح والا شف وإن طال وإن قصر= حده كذا قل خيركم مكثور
20- ولاشفت موخر قرد تذكر وجوهنا = وفي الغرلا الشكل والطنقور
21- ونعْس العيون وناعم الغصن الأمرد = تنبيك عنا يا العيون العور
22- ومع قول( واااو )بغنج واللحي هامل = ما للرجولة عندنا دستور
23- خل البداوة والجلافة تسرك = حنا وردنا والجلوف صدور
24- قلت اخس يا الخاسي كفى الله شرك = وش ذا الفضايح وانت نسل صقور
25- لا والله الا طحت بالجهل والردي = رداك والعلة تبي دكتور
26- دينك ونفسك ثم وكرك وموطنك = بحقوقهم قصرت يا المعثور
27- هيا استمع لأخوك طالع وطاوعة = اندم وتب وارجع وطيع الشور
28- وفكر شوي وطاح نازل بحضني = وون وزفر مما جرى محرور
29- وصحا ولد بكل صوب(ن) وقال لي = مقبول: أنا ياساع شفت النور
30- وضم ابن عمه طالع الحر واقفوا = وكل(ن) يقول لصاحبه مشكور