قالت ابي منك قصيده طريفه
قلت ابشري من قصة ٍ من خيالي
العام يوم أني لقيت الوظيفه
فكرة فالمسيار مما طرالي
ما اريدها دبه ولاهي نحيفه
متوظفه مع بيت مع راس مالي
شهر العسل بالغرب مابين ريفه
بنجلترا والاندلس لا جدالي
اليا طرالي لازماً في مضيفه
اجيه وارجع لا حصل لي مجالي
اريدها بيضاء طويله نظيفه
مع شرط ما تنجب نهائي عيالي
ثقيلةن لكن معايه خفيفه
من حضرتي ماهيب تطلب ريالي
نزلت اعلاني بوسط الصحيفه
من ترغب الزيجه عليه اتصالي
ثم قام مزن الصيف يبرق رفيفه
في شاشة الجوال ياه ام لالي
ما عاد الَحق والرسائل كثيفه
كني موطف موقعه سنترالي
ثم عشت ليلات الغرام الكليفه
متجنب ن درب الحرام بحلالي
مع وحدةن تقول مالي وصيفه
شرقاً وغربا ً والجنوب وشمالي
ابيغيك مسيارا بنفس ن عفيفه
من بعد ما رديت كل الرجالي
ثم قلت ابا اشوف الفتاه اللطيفه
شوفة شرع ماهيب شوفة هبالي
قالت تعال ابشر بنظره شريفه
نظرتك من حقك تشوف الدلالي
ثم جيت اشاهدها كأني خليفه
ساعة مشاهدها لعنت الليالي
عز الله اني شفت بالعين شيفه
مازالت الصدمه بعيني وبالي
دبابةن محروقةن من قذيفه
ماعاد تنفع في مسير وقتالي
قد شارفة خمسين عاماً ونيفه
طبلونها خلّص ولا به جمالي
لاشفت عينيها تقول الكفيفه
زرقا اليمامه شوفها بها عدالي
الله يعين اللي تجي له وليفه
يومين والثالث يصيبه خبالي
سودا وتحمل فوق الاكتاف ليفه
المشهد اللي صابني بختلالي
مع اختها تاقف وصايف مخيفه
ياروع قلبي روع مما بدالي
اعجاز نخل في مشارف قطيفه
ماهيب تُطلع جعلها للزوالي
هربت خايف من طريق لرصيفه
من دون غتره طايحه مع عقالي
صارت إصابات ٍ عليّه طفيفه
نجيت من جرف ٍ طويل ٍ هيالي
النفس من بعض الاماني معيفه
وحرمت انا المسيار مما جرالي
حلم الربيع اللي غدر به خريفه
حت الشجر ما عاد يوجد ظلالي
ترى العزوبيه حياة ٍ كسيفه
اما حفظك الله يجيك انحلالي

__________________