البطالة
ياقلب لا تحزن بـدار السلاطيـن
دار السعود اللـي ذبحنـا غلاهـا
دار الرجال اهل الوفا والمياميـن
اللـي مـع العالـم بعيـد مداهـا
تفرق عن العالم بكثـر المقيميـن
وسياسـة التوطيـن محـدٍ يباهـا
وتفرق عن العالم بكثـر القوانيـن
اللي علـى الاوراق محـدٍ قراهـا
وفيها من التعليم مايبهـج العيـن
من المدارس والمعاهد تباها
والجامعات اللي عليهـا البراهيـن
تبنى ولا زال السـرا فـي بناهـا
وفيها التميز في جميـع المياديـن
بالطب والتعليم واللي وراها
لكن مع هذا التميـز الـى الحيـن
شوف البطالة واصلـة منتهاهـا
نسبة واقدرهـا بخمسـه وستيـن
وكلٍ شهاداته معـه فـي خباهـا
هذا ترى حال الشبـاب المساكيـن
بعـد التخـرج منيتـه مالقـاهـا
بعد الدراسه راح من عمره سنيـن
والحال ماتخفى على اللي شكاهـا
وليا طرق باب الوظايف باليديـن
وجهز ملفـه والوظيفـه نصاهـا
قالوا خلاص ارجع لنا عقب يومين
ولى تجيك اخبارنـا فـي نباهـا
وسط الصحف والنت تلقى العناوين
هـذي سياستهـم وهـذا غطاهـا
تكفى يابو متعب ترى حالنا شيـن
شف حالة شعوبك تزايـد عناهـا
نبي قرارك وانت طلق الحجاجيـن
اقمع هل التخريب والعـن ثواهـا
هذي قضيتنا تبـي منكـم الليـن
وحنا شبـاب المملكـه ونحماهـا
لا تنظر لبغـداد ولـى فلسطيـن
شف علة شعوبـك ودور دواهـا
الشعب من زود العنا كلـه انيـن
اغتيلت احلامـه وظلـم سماهـا
والمشكله فيمـا يسمـى الفيتاميـن
حطم طموحات الشبـاب ومناهـا
اليا متى واحنا على الظلـم باقيـن
وليا متى واحنـا نعيـش بهواهـا
هذا ترى حال الشبـاب المساكيـن
كـل يقـول الواسطـه مانباهـا