الطالب
يالطالب اللي معاك الدرس تدرسبـه
لاهنت مالك عن الانصات معذاري
خل القلم والورق والعلم ركـز بـه
واسمع علومي ولا تنشد عن اخباري
لاصار مالك مع اهل المعرفه حسبه
ولاقيل لك نعم كانه جابك الطـاري
حتى لو ان المعـدل كامـل النسبـه
عند الرياجيل مايعطيـك مقـداري
الرجل ماينحسب لا ضاع به دربـه
حتى لو انه معلـم كاتـب وقـاري
ولو يجتمع له جميع العلم في كتبـه
ماينفعه كان من ثوب الوفا عـاري
غلطان يلي تحسب المرجلـه رتبـه
ولا شهادة شكر ووسـام وشعـاري
واللي يفكـر كـذا عـز الله النكبـه
ياشين بعض العقول وشين الافكاري
لكـن عـز الله ان المرجلـه تشبـه
نجم الجدي في السما عالي للانظاري
ودروبها كايـده ودروبهـا صعبـه
ولا نالها الا الرجال طوال الاشباري
لا تحسب ان المراجل ياولـد لعبـه
ما انته لها كان من ثوب الوفا عاري