[poem=font=",6,darkblue,normal,normal" bkcolor="transparent" bkimage="" border="none,4," type=0 line=1 align=center use=sp num="0,black""]
انا ماطرقت الباب عن مقصدي تايه=ولا وقفت اقدامي تعابا من السير
انا ماطرقت الباب وفتحه رجايه=ولا كان عندي لكثرة الطرق تبرير
انا ماطرقت الباب امارس هِوايه=ولا كان همي كله امشي مع الغير
انا جيت ابثبت للبشر انتمايه=لو ساقني للباب رب المقادير
انا جيت وشّموخي مثل نخل سايه=انا جيت والهامه تعدى شمنصير
انا جبت الامل ويّاي لسنيني الجايه=عشان اغرسه فالجرهديه نواوير
انا جيت يحدوني الامل مع خِطايه=انا جيت متوشّح ليالي معاسير
انا جيت باللفظ الصريح وكنايه=اباها تمازج مع كنايه وتصوير
انا جيت ابكتب قصتي من البدايه=على وجه غيمه من الليال المدابير
انا جيت ابحلّق شعر في سمايه=ابخلي المهموم من فرحه يطير
انا جيت ابسكب فالجداول ظمايه=انا جيت ابا هِلّ السحايب شخاتير
انا جيّتي ماهي وسيله لغايه=حتى تكانفني جميع المحاذير
لكن لقيت الكلّ تحت الوصايه=والشر مايترك صراعه مع الخير
ولقيت من يرقى بعال البنايه=مايدري ان الوقت به صبح وعصير
ولقيت من ينسج خيوط الدعايه=كبّر صغار وصغّر رجال تصغير
ولقيت من يحكم نظام الولايه=وسّع مجال البطش باسم التعازير
ياساكنين القصر ليه حكايه=تشبه فعل جسّاس مع سالم الزير
ابعرف على عيون الملا وش خطايه=لا من طلع زرعي تهب المعاصير
من يستمع منكم فصول الروايه=واشوف في وجهه لفرجها تباشير
وان كان من يسمع يخاف النكايه=اتحمّل ظهور المطايا البواكير
ويديّ مافكت تراها عصايه=ولا اطلقت من حلق ثوبي ازارير
ورجليّ مازالت بداخل حذايه=والدرب تمشيه الرجال المناعير
ومليون باب القى من اهلها عنايه =ولا باب تلقى فيه دق المسامير
ويا خالقي وحدك عليك الشكايه=اللي عيون العبد لاجلك مساهير
قصة مسافر ماوصل للنهايه=والمعذره لنخان حرفي تعابير
[/poem]