مرثيه في المرحوم بإذن الله إبن خالتي الشاعر سعدي خويتم اللبيني نسأل الله أن يرحمه ويتجاوز عنه ويجعل قبره روضه من رياض الجنه ويرحم جميع موتى المسلمين

جاني خبر بمكالمه عبر جوال
خلى هواجيسي ذهيب وشريدي

الله من دمعٍ على الخد همال
كُل مايجف الدمع عود جديدي

يامصعب الدمعه على خد رجال
وياسهلها من حزن فوق الفقيدي

ياسعدي إبشر لك بمنزل ومدهال
جنه بها اللي تشتهيه وتريدي

ياجعل لك في جنة الخلد منزال
وتكتب شهيد وتاخذ أجر الشهيدي

يالموت وشبك ما تريضت معجال
على النشاما أنشهد إنك مكيدي

ليتك تبديت الخسايس والأنذال
اللي تدور للضرر ماتفيدي

ويالموت أخذت من الرياجيل مشكال
أنشهد إنه فالشكاله فريدي

في مجلسه تلقى معاميل ودلال
وكريم سبل وفالرشاده عقيدي

وكثرة خطاه معدله درب مجدال
لاجل الصلاة يتمها فالمسيدي

هذي كنوز الأخره خير الأعمال
ماهو رصيد الراجحي والوليدي

عقبت ياسعدي مطانيخ ورجال
أخير من كنز الذهب والرصيدي

وياسعود هذا درب ماعنه محوال
ياسعود لاتبكي فقيدك فقيدي

لاتشتحن ياسعود ياطيب الفال
الله هو اللي معتني بالعبيدي

وانا ادري أنك كفو للحمل شيال
والشر جعله فوقكم مايعيدي

إصبر ترا اللي يعقد الحبل حلال
وخلك على الشدات قرم وشديدي

هذي حوال الناس راحل ونزال
ولا بد من يوم الضعن والشديدي

ولو القصيد يعقل ذاهب ورحال
أكتب دواوين الشعر من قصيدي

وهذا مقدر يقصر الوقت أو طال
والأجل مالك عنه درب ومحيدي

دنياك ماتسوى من إخراك مثقال
كل ماعلى الدنيا مصيره يبيدي

ويابو محمد ياسعيد إطرح البال
ما للبنيخي غيركم من عضيدي

والله برزق الخلق ياسعيد كفال
هذا هو العلم الوكاد المفيدي

من بعد ربي مالهم غيرك ظلال
ياسعيد ياوجه السعد ياسعيدي

والله لو الموت يالربع رجال
لاثني عليه اللي مهند حديدي

وإن كان من كلمه ولا بد تنقال
لابد نحمل فوق حدب الجريدي

إما لجنه جوفها الناس تختال
ولا لنار تقول هل من مزيدي

يالله ياللي عالم بكل الأحوال
تختم لنا بالخير قبل الوعيدي

هذي مشاعرنا من الفكر تنهال
كتبتها من دم وسط الوريدي


نفاع عواض الربيقي

__________________
اللهم صَلِّ على سيـّدنا مُحمـّد عدد ما ذكره الذّاكرون الأبرار و صَلِّ اللهم على سيـّدنا مـُحمـّد ما تعاقب اللـّيل و النـّهار و على آله و صحبه من المـُهاجرين و الأنصار و سلِـّم تسليماً كثيراً ، برحمتك يا عزيز يا غفـّار