الكيف ماهو كيف وأنا لحالي
الكيف لازم من يمين تسوقه

له صبة وأنشد عدول الرجالي
وله خرمةٍ فالراس ساعة ذوقه

من دلة ماهي سوات الدلالي
لاحمسته نيه ولاهي محروقه

وله حزة ساعة هبوب الشمالي
يوم الحياء ترعد وتبرق بروقه

في حيد خدر مدرك بالحبالي
ضلٍ لو إن الشمس فالقيض فوقه

فيه الرجال اللي تضد الحلالي
ومعزبه يانس دمه في عروقه

راعي جميله من عيال الحمالي
ماله مثيل وتامن الناس بوقه

من روس قوم وعرفته راس مالي
ولينتخى يلقى رجالٍ تشوقه

كنه جبل من نايفات الجبالي
يسوق ماله من خلافه يسوقه

واللاش ماله فالشكاله مجالي
والثوب جار النار تكثر شقوقه

والصفر ماهو مثل سلم الريالي
لاطب فالاسواق تضهرفروقه

ويالله لياء شديت يمك رحالي
تغفر ذنوب اللي قصر في حقوقه

(نفاع الربيقي السلمي)

__________________
اللهم صَلِّ على سيـّدنا مُحمـّد عدد ما ذكره الذّاكرون الأبرار و صَلِّ اللهم على سيـّدنا مـُحمـّد ما تعاقب اللـّيل و النـّهار و على آله و صحبه من المـُهاجرين و الأنصار و سلِـّم تسليماً كثيراً ، برحمتك يا عزيز يا غفـّار