السلام عليكم ورحمة الله وبركاته
اسعد الله مساكم بكل خير
قصيدة كتبتها بعد موقف حصل لي وابياتها تختصر شرح الموقف
اترككم مع القصيدة
مفهوم الاصحاب
ياطيب السيره ويا خير الاحباب
يا فزعة المضهود كان اعتزا به
تعال اخذ شعري ودونه بكتاب
عنوانه الاصحاب باول كتابه
ممنوع ترجمته وممنوع الاعراب
وحروف صفحاته مافيها رتابه
كتاب عام ولا يخصص لطلاب
نبذه عن الاصحاب موجز جوابه
يحكي لك الواقع ومفهوم الاصحاب
باسلوب شاعر محترف بالكتابه
بعض العرب له صحبة كلها اجناب
ويعذرب الادنين لو هم قرابه
وصف الاقارب عندهم عقرب وداب
عمم خطا فردي على جمع لابه
ياهيه لا تخطي ولا عاد ترتاب
خذ شور غيرك والخطا صك بابه
راع الوفا والطيب في خوته طاب
قريب لك والا بعيد انتسابه
يا كم عرفنا اصحاب من ضمن الاقراب
وقت الطلب درع وحزام وعصابه
ويا كم عرفنا اصحاب من ضمن الاغراب
وقت الطلب هم وهوان وكآآآبه
الناس دوم اجناس صادق وكذاب
الطيب يفرق والاسامي تشابه
صاحب نباه مع الاصاحيب ترحاب
في مجلسه تسمع هلا مرحبا به
على النقى دايم به الظن ما خاب
عز الخوي لا من نصاه وهقاااا به
والبعض الاخر بين سايم وجلاب
صاحب علومه ليل ظلمى وغابه
وقت السعه ملسون مفتول الاشناب
والا نهار الضيق ضيع ركابه
عز الله ان هذا بلا ابوك يا عقاب
جابه وتوفي عن ثمانين جابه
يا مكثر الاصحاب والوضع منساب
ويا قلهم الوقت بيين صوابه
اصحاب ما تغنيك عن صاحب غاب
يا كثرهم حولك وتحسب غيابه
واصحاب لو غابوا ما تحسبهم غياب
يكفيك عنهم من تحب اللقى به
اتعب على خوة عريبين الانساب
اهل الوفا والطيب واهل الذرابه
واحذر من اصحاب المظاهر والالقاب
ما يروي العطشان شوف السحابه
يا خيرة الاحباب يا كل الاصحاب
هذا كتابي جاك وافي جوابه
في داخله بيت القصيده والاعراب
الطيب يفرق والاسامي تشابه
وتقبلوا فائق تحياتي
اخوكم
ابراهيم السلمي