العيون المظاليل
ياهاجسي لاهنت ود المراسيل
هات العلوم وهات معك البشاره
ماعادلي قوه ولاعادلي حيل
والزين طال مع الحياه انتظاره
صار السهر عادة عيوني مع الليل
ليل عسى المولى يعجل نهاره
ولاجا الصباح اشعلت نار المعاميل
ودموع عيني تنهمر في غزاره
العين مزنه والدموع الهماليل
والفكر موج واظطرب في مساره
عييت اسلي خاطري بالمواويل
ولالي سوى ذكر الحبيب ودياره
مافادني كثر الحكي والاقاويل
طال انتظاري عقب صدر قراره
عزم على فرقاي من دون تأجيل
حسبي على قلبي وشين اختياره
غرتني عيون الغنوج المظاليل
انا اشهد ان الزين فيها خساره
اخذت من درسي عبر للمقابيل
والرجل ماتشبه يمينه يساره
طال الزمن والفايده والمحاصيل
جنيتها ودونتها في عباره
الرجل مايتبع هل القال والقيل
والي تبعهم راح عمره خساره