السلام عليكم ورحمة الله وبركاته
وكل عام وانتم بخير
من جديد نقدم لكم هذه المتواضعه التي تحكي حال الشعر وشعراؤه في الاونه الاخيره
وفقني الله واياكم لكل خير
للفعل عين وللسواليف ميزان
والجابه الجزله تنومس باهلها
والحجه اللي جات من دون برهان
ما فادت اللي باللزوم احتملها
ياهاجس الشعر والميقاف لك زان
شرد القصايد لا تدور بدلها
ما دام لك بالعز رايه ولك شان
هات الجزيله واجتنب عن هزلها
الشعر موقف والشواعير فرسان
للمركز الاول ترى الكل ولها
احدن بشعره يدحم بكل ميدان
ويشوم عن هزل القصيد وسفلها
شعره تغنى به قوافل وركبان
ابيات شعره شرفت من نقلها
واحدن بشعره خلخل بكل الاوزان
الشعر وبحوره عجز لا يصلها
يقول انا شاعر وهامور قيفان
عزالله انه علة من عللها
واحدن يدرعم ويتهيض بالالحان
وكبود خلق الله بصوته دبلها
الشعر يبرى منه في كل الازمان
لا ينقض الجابه ولا قد فتلها
وانا ليا جات المواقف كحيلان
بطل بطل لا قيل منهو بطلها
من دون قاصر في طويلين الايمان
اهل الوفا والطيب ماحدن جهلها
كلن على حسب عمله بين الاكوان
والنفس ما تجزا بليا عملها
وعداد ثعل هل من غر الامزان
واحيا الديار اللي يباس نخلها
صلوا على المبعوث رحمه للانسان
غيث القلوب اللي بهديه شملها
وسلامة الجميع