[poem=font=",6,darkblue,bold,normal" bkcolor="transparent" bkimage="" border="none,4," type=1 line=1 align=center use=sp num="0,black""]
سلامات ياناجي من الشر سلامات=نجاة راسك نعتبرها غنيمه
وجروح جسمك لو قالوا عميقات=مع الزمن تبرأ وتصبح قديمه
لكنك اسمح لي ابرسل اشارات=من قلب صافي للعقول الفهيمه
مااقولها مزحٍ ولاني بشمّات=اقولها صادق بنيه سليمه
ربعك لها في مثلك آمال وهقوات=آمالها كبرت وصارت عظيمه
وصارت توسم فيك حل الصعيبات=تذكرك لادور غريم لغريمه
واليوم ينعاد النظر فيك بالذات=ياشين بعد السيل لاجات ديمه
الزله من العاقل ليامنها جات=تمسي الظماير من وجعها سقيمه
من كان له سمعه وجاه ومروات=واجب عليه يصونها من الخريمه
الناس خالقها جعلها مقامات=وكلن على فعله يعلّق وسيمه
والرجل يختار الفعول الجزيلات=ويختار من بين الخلايق نديمه
ومن كان للريبه بوجهه علامات=لايقول ظن السؤ فيه ظليمه
خلك مع أهل الطيب تمشي مسافات=وابعد عن اللي فالمعاصي مقيمه
واصلح ضميرك واعتبر بالذي فات=يصلح عملك وسكتك مستقيمه
ولاضاق بالك من شديد الملمات=إفزع لمن يحيي العظام الرميمه
ولانست من ذنبك ندامه وحسرات=سخره للطاعه وقود وعزيمه
هذي نصيحه صغتها بعدة ابيات=جاتك من عروش الفؤاد وصميمه
أبغاك تقراها على النفس مرات=والعاقل يقولون عقله خصيمه
[/poem]