[poem=font=",6,darkblue,bold,normal" bkcolor="transparent" bkimage="" border="none,4," type=0 line=1 align=center use=sp num="0,black""]
سلام كنه غيث مايسبقه رش=يحيي له ديارٍ سنيات وعطاش
من قلب صافي ماسبق خالطه غش=لاهل الوفا والطيب ابيض من الشاش
ينصى رفيقٍ لالمح وجهك يبش=ويقصر عن اللي دوم للعيب نباش
أعطيه صافي علم وأبعد عن الدش=لو كان فكري من غثا الوقت منداش
الجسم مابه من صروف الدهر خدش=لكن روحي كنها بغرفة نعاش
والقلب كن بداخله سبع ينهش=والكون في عيني كبر راس منقاش
كله سبايب غيمةٍ برقها نش=واقفت بها الحايه بعد جابة رشاش
وراح الرشاش بحلق الاعمى والاطرش=مصوا ثراه ولابقى منه نطاش
راضي بما يكتبه ربي ولاطفش=وارفع يديه واشكره حزة غباش
واقدم الحكمه على سياسة البطش=واشيل ناس من الوفا مابها عراش
وأسوق للشاعر معاني مثل طرش=طرش بدوي ماحازها كل بطاش
قصدي بعيد ودونه العظم يندش=ليا عرفته دز لي منك مطراش
وليا عضاك الحل لاتعبشه عبش=لأن مابه ذيب يركض على ماش
انظر يمينك معجزة خالق العرش=الكف واحد ومن أصابعك يناش
اربع تجاور فالمنازل ماتنطش=وابهامها كنه عن الاربع انحاش
الاربعه من غير الابهام تبلش=ومن غيرها الابهام عن مقصده طاش
إرفى يمينك لايجي عظمها هش=ويطمع بها في ليلٍ اسود ولد لاش
وليا أوجعك أحد الاصابع تنحش=دور دواه ولاتكاثر به الكاش
سلامته لو كان مايرفع القش=ولانقص في يمنى الرجل طول ماعاش
وليا ازرت اليمنى مثل سرعة الرَ مش=تفزع لها يسرى بها خمسة أوباش
واسمع نصيحة من نقشه الدهر نقش=يسوقها لمثلك هديه من الجاش
ترى يمينك لن مرضها بها خش=وتركتها عابت وروحت ببلاش
ويمنى بلايسرى ماهو صعب تنحش=هذي حقيقه مالها عندي نقاش
ولايطيب جرحك لو يداوى مع النبش=ولايرد مكتوب الرجل كثر ماحاش
واحذر يغرك هالزمان المزركش= اللي تساوى فيه مخلص وغشاش
[/poem]