قصيده مرسله لي من الاخ الشاعر القدير
مصعب الدميحي حيث اننا مجموعه في
قروب وحصل بيني وبينه سوء فهم لكلمه ربما
كتبها خطأ وفهمتها أنا خطأ وزعلت في
حينها ورديت عليه بكلمه وخرجت من المجموعه في تلك اللحظه وقالوا له اصحابنا الموجودين ابن مقحص طلع زعلان
وارسل لي هذه القصيده
=========
سلامي سلام اغلى من الدر والمرجان
يقدم لابن مقحص طليق الحجاجيني
ياحمدان هد شوي ياشايب الرحمن
يانسل الشيوخ مرجحين الموازيني
علي يشهد الله ماتقصدك بالنقصان
ولاني من اللي ينقصون المياميني
ولاني على رجال الصمايل طويل لسان
ولاجيب علمٍ ماثبت له براهيني
ولا ارمي ببندق مالها حبه ونيشان
وشخصٍ قناها تفشله فالمياديني
وجاني خبر قال ابن مقحص طلع زعلان
يقولون من علمٍ حصل بينك وبيني
لك العذر والتقدير لن كنت انا الغلطان
ولن كان غيري ذنب غيري مايعنيني
وتراني لزلات الرفاقه وسيع بطان
ولا حركتني كلمةٍ بين قوسيني
ابدمح خطا ربعي لو انه كما الضلعان
ابكسب رضا ربعي وابغضب معاديني
وابختم بذكر الواحد العالم المنان
وذكر الرسول مبلغ الوحي والديني


الشاعر/مصعب الدميحي

ورديت عليه بهذه القصيده وعادت المياه الى
مجاريها والحمدلله


هلا مرحبابك يالدميحي من السلمان
بعد ماوصلني عذرك العذر يكفيني
يامصعب يهون العلم ياالذرب ياكحيلان
يانسل الرجال العارفين المسميني
مصدق ولك عندي بعدها مقام وشان
لعل الذي مثلك من الربع مايهيني
كفو والزلل مدموح مابيننا يافلان
عن الطيب والتقدير ماهي بتثنيني
ومهماحصل تبقا رفيقي ومهماكان
على ايمينك ابقى وانت تبقى على ايميني
ولكن كلمه تغضب الرجل بعض احيان
ولوكان قايلهامايقصد بها شيني
وللرجل في مايكتب وينطقه ميزان
بها يحفظ حقوقه وحق القريبيني
على كل حال العذر بالعذر ياذيبان
مثل مابراك العذر فالعذر يبريني
نبي نطوي الصفحه ونكتب لها نسيان
ولاتنقص سنينك ولاتنقص سنيني
ختام القصده نشكر الله عظيم الشان
خلقنا من الماء وآدم اصله من الطيني


الشاعر
حمدان ابن مقحص

__________________