اطرد سراب اللال واعيش الاوهام
واسرد بقايا قصتي والبطوله

وصوت القلم في صفحتي مثل الانغام
تراقصت لاجله حروف خجوله

فاح الحبر في دفتري والورق قام
وفز الكلام بخاطري قبل اقوله

وسارت بي الفكره كما سير الاقدام
واسرجتها واثقلتها بالحموله

حملتها من واقعي عشق وهيام
واسهرتها ليل الغرام وفصوله

حتى قضيت الليل والجفن مانام
طول علي الليل وارخى سدوله

وعمر الفتى موطن طموحه والاحلام
اما بوقت الشيب ولى الطفوله

وانا طموحي حر مايقبل خطام
يمشي على كيفه ولا احد بحوله

يمشي على كف القدر طول الايام
واليا بغى له شي غصبا يطوله

مير الكلام اللي على علم والمام
اللي يشرفني ليا جيت اقوله

الله يثبتنا على دين الاسلام
وصلى الله وسلم على احمد رسوله

__________________