اول قصيده اشارك بها في هذا الصرح الشامخ اتمنى ان تحوز على الحد الادنى من استحسانكم

عديت في راس الطويله وقت ميعاد الغروب
ماعندي الا صورته بانت على رسم الخيال

اللي غزاه الحب دايم بالشقى ناره شبوب
يصبح ويمسي والرجى ينحيبه لصعب المنال

والا يسندبه على كف الممازح واللعوب
هذي بها ريبه وهذي مابها الا طيب فال

من يوم عرفيله وانا واياه ما فينا مغلوب
بنينا سد(ن) معتلي ماياصله قيل(ن) وقال

حبيت فيه إنه مايدرج غير صعبات الدروب
راسه عنيد ولا نوى شيئا (ن) يجيبه لامحال

طبعه كذا من خف دمه والتفاته دوب دوب
لا دق رمشه يمتي جتني سهومه ب الدلال

خفيف دم وضحكته سكر على صدري يذوب
يذوب مابين الحنايا الحالمه لحظة وصال

مشاعره نبع(ن) من الوجدان مايشكي نضوب
دافي يذكرني شعاع الشمس لا غرب ومال

ميت بحبه والحقيقه واضحه من كل صوب
مفتون والفتنه غدة بالروح لحدود الهبال

من كثر حبيله ماودي تلمسه نسمة هبوب
اخاف لعيون الاوادم تسرق السحر الحلال


الشاهد الله عن وصال الريم روحي ماتتوب
لو حال مابيني وبينه امر لايمكن يزال

ويلاه من وقت(ن) اخاف طعونه تصيب القلوب
تغير هجماته علينا من يمين ومن شمال

ماعندي قدره للجفى والبعد وعسرات الخطوب
الموت ارحم من حياة(ن) مابها بدر الليال

(هويت وده) وادري المكتوب مامنه هروب
بس البلا ف الجادل اللي يستوي فيها الكمال