[poem=font=",6,darkblue,normal,normal" bkcolor="transparent" bkimage="" border="none,4," type=1 line=1 align=center use=ex num="0,black""]
رجّع عقالك واعتدلي بمجلاس=واسمع كلام من الذهب وازنينه
ياللي شكيت من الرزايا والاتعاس=كلن يشوف اللي انكتب في جبينه
ولانت الوحيد اللي من الهم منحاس=ولاحدٍ على دنياه عنده ظمينه
شكيت لي من هم ماينصف الكاس=وشلون لو همك حمولة سفينه
انظر لمن هو بلجة الهم غطاس=ولو زاد همه مايبيح كنينه
وليا دخل قلبه من الهم وسواس=والنفس صارت للهواجس رهينه
يفزع لمن جنده على الخلق حرّاس=وامره على خلقه ينفذ بحينه
ولايعلم بحاله حسودٍ وبلاس=ولا ناس تحمل فالقلوب الظغينه
واللي سكن ياصاحبي تحت الارماس=ندعي لهم بالمغفره والسكينه
وذكره الطيب يبي منك نوماس=تعرفك به كل الرجال الرزينه
لاتحسب اللي يصير في ليل خرماس=مايعرفه ربي ولاتشوف عينه
وافهم كلام يحط لك بين الاقواس=كلن بفعله لابته عارفينه
مايغتني من تاجر بنك الافلاس=ولايظام من يرقى البروج الحصينه
وصلاة ربي عد ماهب نسناس=على محمد حسب شرعه ودينه
[/poem]