[poem=font=",6,darkblue,normal,normal" bkcolor="transparent" bkimage="" border="none,4," type=1 line=1 align=center use=sp num="0,black""]
ياقلم أروى من الحبر المسال=ثم لاتشكي عليّ سطوة بناني
ولا تذمّر لو نزف الحبر طال=خلّ لون الطرس يرجع لون ثاني
واكتب ابياتٍ مثل وزن الجبال=واحلى من شهد العسل وسط المجاني
قلتها من هاجسٍ صعب المنال=بعد ماوقتي على القصيا حداني
أرعدت لي المعاني (ف) الخيال=ثم هلّت وبلها على المحاني
وأنبتت للشعر في صدري تلال=فيها من نبت النفل والاقحواني
وتخيّرت الشعر من كل جال=وقطفته من حسينات الجناني
ثم جيت اقدّم الشعر ارتجال=للرجال اللي تشوفه بالعياني
والشعر مكسب واعدّه راس مال=في لزومي لا بغيته ما عصاني
منزله عالي بقلبي ولا يزال=لو اخذ مني اقول انه عطاني
ولا نقول الشعر للناس ابتذال=ولاندور من وراه لمدح فاني
ولا عليّه من مثيرين الجدال=فالنهايه خاسرين بلارهاني
والرفيق اللي ينادي للنزال=مدري ليّ القول والا ماعناني
استحق النصح مني بكل حال=والنصيحه واجبه للمودماني
التحدي تكون للمسلم مثال=فالسماحه والتسامح والتفاني
ومعرفة فرق الحرام من الحلال=ومافرضه الله فالسبع المثاني
والعمر لحطه مثل وقت الزوال=خلها طاعه توصلك الجناني
والتحدي في جزيلات الفعال=ونصرة المظلوم ردع لكل جاني
وتذكّر لحظة فراق العيال=وساعةٍ فيها الخفا مثل البياني
والتحدي ترك منبوذ الخصال=واغتنام الخير في شهر رمضاني
ياقلم بعد انتهى الحبر المسال=انتهى ماجاك من سطوة بناني
[/poem]