العقد الفريد

سلام من شاعر علم على الشعر ماهو جديد
لكن ياسلطان . لجل عيونك ابياته جدد
شاعر نظم شعره مثل ماينظم العقد الفريد
يشهدله اللي يفهمون الشعر بالجزل انفرد
يامرحبآ عندآل ثابت بالقريب وبالبعيد
يامرحبا . يامرحبا . يامرحبا . بلاعدد
يالشيخ عبدالمعطي افرح شوف سلطان الحفيد
ارسى من جبال السراة لغير ربه ماسجد
صادق وعاقل محترم شجاع قلبه من حديد
كريم . متواضع . وبالاخلاق كلآ له شهد
يمتاز بالحكمة . ورايه فالعرب رايآ سديد
ماهو بحاجة من مدح . مايلتفت للي نقد
تعال ياسلطان . ابسمعك بيت من القصيد
اناقصيدي غير . ياسلطان ياوجه السعد
لن جات للعلم الصحيح ان جات للعلم اﻷكيد
احب انا . سلطان ابن سالم . محبة لﻷبد
انا اعتبرسلطان في قربه مثل حبل الوريد
سلطان عندي مثل ابو متعب ومثل ابوفهد
مبروك لك ماناحت الورقى على خضر الجريد
مبروك لك عد النبات . وعد حبات البرد
عساك دايم دوم ياسلطان مبسوط وسعيد
يحميك رب البيت ياسلطان من شر الحسد
منزلك عالي عندنا والله على قولي شهيد
سالم زرع فيكم صفات الطيب من يزرع حصد
قولوا عسى الله يرحمه رصيد من ماله رصيد
اليوم اشوف عيال وسالم شبل من ذاك الاسد
ارفع يديني واسأل الله يرحمك يابو رشيد
يوم ان بعض الناس . يفنى ماعرف درب الرشد
ولي الفخر بسليم تاج الراس والركن الشديد
الطفل منا شيخ بالاخلاق للعليا صعد
حنا خوال المصطفى واصحابه ولله عبيد
اعوذ بالرحمن . من حاسد . ونفاث العقد
كلآ يريد . ويفعل الخالق . بعبده مايريد
اﻷمر لله ربنا المعبود . من قبل وبعد
بعض البشر بالدين والاخلاق والفعل الحميد
مايخضع الا للعظيم . الواحد . الفرد . الصمد
وبعض البشر قوله وفعله مثل شيطانآ مريد
اعوذ بالله منه . في وجهه علامات النكد
والعولمه والنت تبني للعلا قصرآ مشيد
ومن هولها في جيد بعض الناس حبﻵ من مسد
يحتار فيها العاقل وينعم بها القلب البليد
تقرب ابعد شي . واللي كان في يدك ابتعد
والشعر جزل وهزل . وزن وقافية . غث ومفيد
الشعر ديوان العرب . من يظلمه ليته هجد
بعض القصايد لن سمعناها . نقول اعيد اعيد
وبعض القصايد مهزلة . ياليت شاعرها رقد
صلوا على شفيعنا . يوم التغابن والوعيد
ثم اسألوا رب البشر . يحفظ لنا هذا البلد

__________________