بسم الله الرحمن الرحيم




ليه التعالي والحزن ف الملامح
يخفي لسانك لكن عيونك تقول

اشوف همك تالي الليل جامح
واثار دمعك من على خد مبلول

عطني علومك ادري القلب كادح
وسحاب همك يمطر الحزن هملول

ضيعت عمرك بين صمت وتسامح
وخليت لك جنبٍ مع الناس مشلول

هذا كلامه مرٍّ و ذاك قادح
وانت انت ما تنطق سوى هرج معسول

تمادوا العربان ضاوي و سارح
واشوف وضعك مثل ماهو على طول

نطق لي بكلمة : تبينا نتصارح؟!
انا بخير وخاطري غير معلول

أبكي فرح ودموع عيني تطارح
مبسوط مستانس ولاني بمذلول

كسبت شيٍّ ما يجي بالمشالح
ولا يجيبه سيف ف الوجه مسلول

كسبت حب الناس فاسد وصالح
وكسبت دعوة شخص بالغيب مجهول

قلت بغرابة زيدني بالنصايح
انا من اللي قاعد تقول مذهول

قلي تبي ترتاح خلك مسامح
هرج البشر وطعونهم كلها تزول

شف ذي يدي حتى المعادي تصافح
وابشرك مبسوط ماني بمذلول