رد: ديوان الشاعر حمدان بن عامر الشكري (ابن مقحــص)
( يابوي )
يابوي فيّ أطعون برماح وحراب
عيت تطيب وصعب فيها الطبابه
يابوي بعدك صارت همومي أسراب
اللي لجا فالقلب واللي سرى به
يابوي صدر أبنك من الهم مرتاب
مما جراله في زمانه وصابه
يابوي ماعاد الزمن يعرف أقراب
وأكثر طعوني من يدين القرابه
يابوي صرنا اقطاع واوصال واحزاب
كلن على اللي منه صوب حرابه
يابوي لو صاح الزمن ضيق وعتاب
ما احدٍ سمع صوته ولا أحدٍ درابه
يابوي من جور الزمن صرت منصاب
حتى توشحت 00 الألم والكآبه
يابوي صار الصدق في وجه كذاب
حتى على سطح البسيطه رسى به
يابوي كل الظن في عالمي خاب
وكلٍ على ليلاه جر الربابه
يابوي عذراً واكثر الناس نصاب
وراع الوفاء والطيب طيبه غدى به
يابوي نغضي ونتسامح بلاحساب
ونفك باب الوصل ويِصْك بابه
يابوي راح الطيب سطرين بكتاب
واللي قراها مافهم للكتابه
يابوي مادام الجفا ماله اسباب
أنا استخير الله وارجي ثوابه
يابوي ناقوس الخطر دق الابواب
والصدر ضاعت به رموز الخطابه
والوقت يركيني على نار مشهاب
حتى وسم في وسط قلبي شهابه
يابوي لاتنشد عن أحضور وغياب
اللي غدا ماعاد يحسب حسابه
يابوي ماعدنا مواليف واحباب
حتى وجيه الخلق صارت تشابه
يابوي صبري والحكي داخلي ذاب
ذوب الحديد اللي على النار ذابه
يابوي مابه فالزمن ربع واصحاب
والوقت كشر لي بضرسه ونابه
يابوي أنا صامد ولازلت ما اهاب
الا من اللي كل خلقه تهابه
يابوي شكوايه على رب الارباب
اللي خلقنا و نندفن في ترابه
حمدان ابن مقحص
__________________
التعديل الأخير تم بواسطة حمدان بن مقحص ; 11-20-2015 الساعة 12:43 AM
|