رد: ديوان الشاعر حمدان بن عامر الشكري (ابن مقحــص)
( لاتحمل بقلبك ويزداد غله)
احشم قريبك لن غلط واحتمله
لاتكدر الخاطر وتبديله الشين
ولياخطا دربه على الدرب دله
مافيه معصومٍ يكود النبيين
وإن جاك والا جيتله في محله
خل النوايا صافيه يااحمرالعين
ولاتحمل بقلبك ويزداد غله
الغل ماينفع ولايقضي الدين
واطلق حجاجك للقرايب وفله
خلك مثل ماقيل طلق الحجاجين
واكسب رضاهم والوفاء لاتمله
ترى الله موصي بوصل القريبين
واحفظ لهم واستر لهم كل خله
الله ستارٍ يحب الستيرين
واصبر ليا جات المشاكل مطله
من شان ماتفرح علاك المعادين
واحرص على الميقاف في وقت حله
لاتعتذر وتقول بكره وبعدين
والسيف في وجه المعادين سله
حتى يهابك من وزته الشياطين
وابذل من المعروف والطيب جله
واعرف ترى الدنيا بها الشين والزين
ولا يصير فيك الكبر طبع وجبله
ترى التكبر من طباع الصغيرين
واصحى ترى الدنيا ماهي دوم فله
ايجيك يومٍ فيه تحتاج الادنيين
هذا الصحيح وكل عاقل يدله
قولٍ مثبت بالحجج والبراهين
__________________
|