السلام عليكم ورحمة الله وبركاته.
اعتذر عن غيابي. الذي طال وقته ولكن.
ظروف حرجه مريت بها. والحمدلله.
نعود لكم. بهذه الأبيات. التى أرجو ان تنال استحسانكم.

بسم الله ابدأ قاصد للقصايد
واللي نوى يبني بيوته بناها

الرجل ميقافه بوقت الشدايد
ولا الرخا كل طحن في رحاها

وقت الرخا الناس شيخ وقايد
وبالموقف الغصاب يعرف خفاها

احد على ربعه يحب المزايد
واحد مع ربعه بروحه فداها

أخذت بالدنيا دروس وحصايد
أهل المصالح ربي اللي بلاها

لابس جديد الثوب والفعل بايد
مطاوع نفسه مشى في هواها

يشبه بعض من لابسات القلايد
اللي تنقل بالحكي في وشاها

خلك مع أهل الجودحث الفرايد
تلقى بها نفسك وتلقى دواها

قوم على الطالات والفعل سايد
لن جيتهم في ملحها وف حلاها

طيب يعم ولا يخصص زوايد
وكيف شربه اللي تمنى مناها

سيف تسله فى الفرح والمعايد
وسيف تسله للحروب وحراها

بنيت بيت الشعر حسب العوايد
من هاجس بضلوعه اللي كواها

يرضيني المقسوم ناقص وزايد
والناس ليتك سالم من حصاها

وختامها بالذكر ذكر الفوايد
صلوا على مختار الأمة هداها

عبدالرحمن سلطان. السلمي.

__________________