هل التقدير
يازين نفحات الهوا يوم نسنـس
يشفي ضميري لاشعرت بنسيسه
وخوة هل التقدير في كل مجلس
هذا دوا قلبـي وهـذا ونيسـه
من طيبهم لاجيتهم يوم نجلـس
من شوفهم تشفى النفوس البئيسه
والكيف لاجا الضيف بنٍ محمس
وريح العويدي فالدلال النفيسـه
ماهو بمجلاس الوجيه المعبـس
الي من التنباك يـوذي جليسـه
واحدهم ليا قام كنه معـه مـس
من ضيقته لاقام تسمع ضريسه
من خوة الاشكال ذولا تحـرس
تراهم أشبه بالنمل في حسيسـه
شم واحتشم عن دربهم لاتدنـس
مالك ومال اهل النوايا الخسيسه
أما بمجلاسٍ تجيـه وتنومـس
الطيب ذخره والمعرفه عريسـه
مجلاس قومٍ لشهامـه تنافـس
مابينهـم كـذاب ولانطيـسـه
خويهم لاحده الوقـت وافلـس
قاموا معه وقت الليال التعيسـه
ولا بلاشي من مجالس هل الدس
أهل الحكي وأهل العلوم الدسيسه
مير الزمن تال الليالي تعكـس
وأعوذ بالله من خـزاه وبليسـه
والوضع مزري وألاوادم مبلس
راحوا لصكات الليالي فريسـه
والليل عسعس والصباح يتنفس
والمسجد الاقصى تحول كنيسـه
وغير عوايدنا راع ok مع yes
نتبع خطاهم لو خطاهم دنيسـه
وأصل الشجاعه في وطنا تدرس
والمرجله والطيب فينا غريسـه
وختامها عداد مالليـل عسعـس
صلوا على راع الخصال النفيسه
نبينـا ألـي لشريعـه مـدرس
صلواعلى آله ومنهـوا جليسـه