[poem=font="mudir mt,6,firebrick,normal,normal" bkcolor="transparent" bkimage="http://www.solaim.com/vb/mwaextraedit2/backgrounds/25.gif" border="none,4," type=0 line=0 align=center use=ex num="0,black""]
يا هيه .. ما فالحُب صادق وكذاب=منهو شرب كاس الهنا واهتنابه ؟ !!
يا هيه .. قصر الحُب له عشره أبواب=وكل ٍ على ماقيل يشعب ركابه
الحُب : صدق إحساس فالنفس ينساب=ود . وهيام . وعشق . شوق . وصبابه
وله . ولع . خُلـّه . غرام أخضع أشناب=ومنها الهوى للحب أكيد انتسابه
الود : همس شعور لو بين الأغراب=ثابت و زود الوقت زاده صلابه
أما الهيام : اللي دخل فيه / ماتاب=حتى لو إن الموت له حدّ نابه
والعشق : سهم الطرف معْ زود الإعجاب=منــْه الخفوق أعلن شقاه وعذابه
والشوق : أماني حلم . والظن ماخاب=لو زالت الأسباب والحظ جابه
وبحر الصبابه : للمحبين . غلاّب=الصَبّ يفقد بالمحبه صوابه
أما الوله : يا هيه .. به حَرقةْ أعصاب=تـَطْفي على صدر الوفا والرحابه
ومنهو تولـّع : حط فالقلب مشهاب=ماينطفي لو هلّ وبل السحابه
والخُلـّه : أعلى الحُب مابين الأحباب=ماتنتوصّف بالشعر و الكتابه
وأهل الغرام : دموعهم بين الأهداب=و راعيه مسلوب الأمر والمهابه
أما الهوى : يلدغ مثل لدغة الداب=مرّه هماج . ونوب عذب ٍ شرابه
و كل البشر في عالم الحُب طـُلاب=و قلب ٍ ( مايستقبل دروسه ) خرابه
حُب ٍ معَك يُولد مثل حُب الاقراب=وتحب ربك . والنبي . والصحابه
حُب ٍ يغيب وصاحبه عنك ماغاب=و حُب ٍ ثبت لو صاحبه في غيابه
والحب خلـّد له شعارات وألقاب=وقصص غريبه فوق حدّ الغرابه
وسحر المحبه خلطته : طُب الأطباب=وخلطة مجانين المحبه : تشابه
ومَحد ٍ يحط الحب غصبا بمشعاب=وما كلّ من حبيت تقبل عتابه
ولا فيه كره وْلاَ محبه بلا أسباب=كل ٍ على كيفه يفصّـل ثيابه
يا هيه .. لو فالحب صادق وكذاب=مَحد ٍ شرب كاس الهنا واهتنابه[/poem]

__________________