[poem=font="simplified arabic,6,firebrick,normal,normal" bkcolor="transparent" bkimage="http://www.solaim.com/vb/mwaextraedit2/backgrounds/35.gif" border="none,4," type=0 line=0 align=center use=ex num="0,black""]
يا شعر أحبك جزل . والهزل ممنوع=وأتعب على حرفك . وشكلك . ونوعك
الكايده بأمر الولي لي تجي طوع=ومن غالي الأفكار أولّع شموعك
شاعر وأحب الشعر والراس مرفوع=يا راس أبو هايل لربك خضوعك
و يا شوق همس القلب . للقلب مسموع=حتى ولو مايسمْعنْه سموعك
المجد دربه بالصعيبات مزروع=تزرع وتحصد فالنهايه زروعك
أسقيك صافي حبي العذب ينبوع=وتطرد سراب اللال ماهي طبوعك
تتبع متاهات العطش في سما الجوع=وتموت بالحسرات ما مات جوعك
قاسي . حنون . بجوفك الضد مجموع=وتَنَاقض أحلامك يفرّق جموعك
عطشان حب . صغيّر السن . دَلُوع=أحرقت قلبك . والحطب من ضلوعك
كم جيتني من حرقة الشوق مفجوع=و يا كم بحضن القلب هديت روعك
شيك التهور في محبتك مدفوع=وش عاد لو أفْقِدك . وأظما . وأجوعك
ياويل مَن في ناعم اللمس مخدوع=اسمع ترى لا اقفيت ما اطلب رجوعك
أبعد عليك شوي من حبة الكوع=وأظن ماتقدر على حب كوعك
لو كان تبكي دم .. ماتبكي دموع=ماعاد يخدعني بكاك ودموعك
إذا صحيح الحب تابع ومتبوع=ياطير مهما طرت غصبا وقوعك[/poem]

__________________