هندامي اللي لابسه ماعجبها
من شان لابسلي عقال وعمامه

لا والله ألا البنت ربي نكبها
ملبوسنا يابنت رمز الشهامه

واهيلتي هالبنت وشهو نسبها
حسبت أبوها من رجال الزعامه

نخلة طريق ! ولا نبي من رطبها
وإن جزت مال الناس فوقي ملامه

بنت الردي حصة حصيني تربها
جنب ملايمها وتلقى السلامه

يا نكبة اللي من بعدنا خطبها
عز الله إنه طب بيت الرخامه

اللي تهقوى يوم ناظر هدبها
بنت الرخامه ماتنومس حزامه

لاوالله الا في حزامه كربها
غراب ربي صدفه في حمامه

طربان لقي اللي يشوقه طربها
ليا جا ولدها ماتقله عظامه

وقع وجات أمور ليته حسبها
تصحي النايم ويحرم منامه

إما يودبها ويحسن ودبها
ولا بنوب بدالها فاللثامه

وبنت الظفر لو كان سودٍ ركبها
أخير من بنت الهزيل الهلامه

بنت القروم اللي عريب نسبها
ياخذ ولدها من خواله قرامه

اللي منيرها وعارف عربها
خذها لك الله ماتشوف الندامه

بنت النشاما يفوز منهو كسبها
يكفي نسبها حط تحته علامه

نارالغضاء مصروفها من حطبها
وحذرا تولعها بعود الثمامه

والدله الصفرا تغانم شببها
كيفٍ ليا ذقته يزيل العسامه



نفاع عواض السلمي

__________________
اللهم صَلِّ على سيـّدنا مُحمـّد عدد ما ذكره الذّاكرون الأبرار و صَلِّ اللهم على سيـّدنا مـُحمـّد ما تعاقب اللـّيل و النـّهار و على آله و صحبه من المـُهاجرين و الأنصار و سلِـّم تسليماً كثيراً ، برحمتك يا عزيز يا غفـّار