الاوله سلام ياللي واجبه غصب الغصايب
ياربعنا الحبشان والمري وصلكم بالقصاصه
حكمه جباري يحكم اللي شانهم صك النوايب
واليوم يالقناص مايمديك عذر فالقناصه
لو كون من دونك درج وحقوق ماحب الطلايب
ياللي تشيل الجيده مافي حزامك لو رصاصه
انته مطوع مجتهد فالدين ومكمل فروضه
قاضي وابي ماسومها عندك وبنظر فالوسيم

والثانيه عز الله ان أيامنا فيها العجايب
دارت براعِ الكرسي الداير سريع الارتقاصه
تسحب عصاة الجهل في كل الدير بين القرايب
وتشيل من فوق البساط الاحمدي كرسي وماصه
فكرت فيها وافكرتني بالتعصب والعصايب
كِثر الدحم فوق الكراسي يوم جات الاعتباصه
اللي كسب مسرور واللي ماكسب ربي يعوضه
يارب تهدي كل مسلم للصراط المستقيم

الخصم

يامرحبا ترحيبةٍ من عندنا والفأل طايب
ياللي تبي عنها تحاوص ماش عن هذي محاصه
واليا بغيت الحق وقت الحق عنا لاتغايب
نمشي على سنة محمد مايجي فيها انتقاصه
الله يبارك فيك لو تجيب زيزوم الركايب
ترى قضاة الحق حنا واستمع منا الخلاصه
الحق مايذهب وراع الحق ماتردي حظوظه
ماسومها من عندنا تكميل ماجوب الرحيم

وأيامنا ندري بها وسبورنا روس الرقايب
والكرسي اللي من قديم احسن من اللي بالبلاصه
والجهل ماهو عندنا يقعد تحت سقف النصايب
وان طالت الهجره يقوم البني وتطيح الخصاصه
ياللي تفكر فالعرب عندك ضوتكم فاللبايب
كلٍ يداحم دون حاله مايحب الانقراصه
تبي تخوض البحر وانته من منول ماتخوضه
وان شفت لك براق يبرق قلت يالله ياكريم