صمت المكان وقاسي الضرف عوقه
واللحظه اللي ذكرتني بغالي

شبّت بدون أسباب نارِ حروقه
جتني بلا ميعاد والفكر سالي

هذا يصب الزيت.. هذا يفوقه
هذي تزيد النار ياويل حالي

غديت كنّي جذع ماتت عروقه
هشيم لو إنه من اللب خالي

تضرم به النيران تحته وفوقه
من وين ما تنصاه تعطيه صالي


والنار نار البعد ماهي شفوقه
يا كم تعذّب من لهبها رجالي


ياليل لو إن الأماني صدوقه
تلقى وليف الروح يمرح قبالي


يهدي عطور الود من زود شوقه
وأهديله المعسول شعر ودلالي

شعرِ جميل اللون ما شاع سوقه
صافي هوى الملتاع دافي وحالي

ياليل لاكن واقع الحال سوقه
يمّه وقلّه ماطر الشوق سالي

قلّه كريم الوصل لاحت بروقه
تومض عليّه من يمين وشمالي


قلّه حبيبك دون حبك وذوقه
ما يخشى لومة ولد عمِ وخالي

شوفه لهيب الشوق جاكم يسوقه
ما يهدأ باله كود عقب الوصالي