بسم الله الرحمن الرحيم
السلام عليكم ورحمة الله وبركاته

قصيدتي في حفل زواج الشاب /مروان ابن الشيخ /حامد بن عبدالله العلوي السلمي في
يوم الاثنين ليلة الثلاثاء الموافق/1437/6/5

قبل اعد القصيده وابتدي بالمثايل
يا سلامي علاكم والسلام البدايه

ياسلامي علاكم عد وبل المخايل
من رفيقٍ لكم شكري ومن قوم سايه

شاعرٍ يستثير المفردات الاصايل
وكل شاعر حسب فكره ونهجه ورايه

المشاعر تسابق بالبيوت الجزايل
والشعر في هجوسي له مقاصد وغايه

جيت في دعوة الشامخ جويد الفعايل
هو دعاني وانا دونه ماتقصر خطايه

جيت اشارك وابارك مع رجال الحمايل
لجل اكمل واجمل ماحسبت لعنايه

جيت امثل قبيلة جيت والراس طايل
جيت حشمه وقدر وطيب ماهي دعايه

جيت واجب لكم يامعربين السلايل
والحضور بحفل مروان غاية منايه

دون دعوة رفيع القدر ماحال حايل
الخُطى له تسابقني بعزم وهدايه

الحليم الكريم اللي يشيل الثقايل
في دروب المراجل رافعٍ كل رايه

حامد القرم شيخ المعرفه والجمايل
من رجالٍ لهم بالوقت علم ودرايه

أعلوي صامل الهقوه حميد الخصايل
صيرميٍ طويل إذراع فيه الكفايه

شيخ عن ربعه العلوان قول وفعايل
دونهم مثل ظلع طويق سد وحمايه

من سليم الفخر والعز واهل الصمايل
المدايح تساق إلهم وتروى روايه

سيرةٍ ثابته ومسجله بالدلايل
في صدور الكتب بالصدق ماهي دعايه

صيت شايع وذايع بين كل القبايل
مجد مبني على ساسٍ جويد البنايه

وارثينه من الجدان قوم الفضايل
حافظينه عن اهل الزيف واهل ألغوايه

انتم القاده الفرسان واهل الاصايل
نصرة الدين/ والحق مع رسول الهدايه

وانتم اللي بالأمجاد آخذين الأوايل
وكل دربٍ على العز مهتوينه هوايه

وانتم اهل الثناء والمدح والشك زايل
وانتم اللي لكم على المكارم وصايه

والعذر كان ماوفيت قول المثايل
العذر فالبدايه والعذر فالنهايه

__________________