قصيدتي بمناسبة زواج الشابين ماجد ومحمد ابناء العميد فيصل ساعد القرشي

خيالي سرى والفكر ساري على قافيه
مع الهاجس اللي يعشق الفن والابداع

من البارحه واللي قبل جلت في صافيه
وبنات الفكر قامت توافد علي أتباع

وسيع الخيال ومنبع الفكر من راعيه
ليامن رسم لوحة شعر ذوق واستمتاع

يقولون جيد البيت من ساسه وبانيه
نعم صح والانفس لها غايةٍ وأطماع

على طول الايام ومدي الوقت من باديه
كُثر من تكسب واشترى بالثمين وباع

وانا ناوي أشري كل غالي شعر والقيه
واسمعه للجمهور لحظة صفا وامتاع

ليامن صفا جوي جزال القصيد أبنيه
بيوتٍ لها الجمهور يسمع صدى وايقاع

وانا اكتب جزال الشعر واجوز عن باقيه
وجوي هذا الليله صفا للهجوس وطاع

بعدها سلامي للمطاليق شعر أهديه
من الراس للي يستحقه وله مرباع

مثل فيصل اللي كل واحد شهم يغليه
ابو خالد اللي له مكانه وصيته ذاع

رجل يدرك الطِيب ويمده على باغيه
ولاله ورى فعل الجمايل غرض واطماع

رجل كل ماذكروا رجال الفعل نطريه
كريم وحليم وطيّب النهج والاطباع

فعوله تشرف ربعه وبين العرب تكفيه
كبير المقام وللمراجل طويل ذراع

ولاهانوا اخوانه وربعه ومن يليه
هل المجد والافعال والعرف والاسناع

لهم مجد وافر بالكتب والعرب تحكيه
من قريش سادات العرب للرسول اتباع

قبيله لها صيت وذكر ما احدٍ ناسيه
بساداتها واشرافها والفعول انواع

وانا من سليم اللي بطون الكتب تثريه
بتاريخ عز وفخر فعلٍ لنا ماضاع

لنا فعل واضح ماجهل من بغا يرويه
على قمة العليا لنا منزل ومطلاع

وكل القبايل فعلها قد ذكر طاريه
على ارض الجزيره صيتهم بالمدايح شاع

هذه مجمل الموضوع والطيب من راعيه
وكلمة نعم يستاهل اللي لها طماع

وقبل الوداع وقبل ا ختم/الشْعِرْ وانهيه
ابارك لراع الحفل فيصل طويل الباع

ابارك واشارك معه ذا الليل واهنيه
على حفلة أعياله عساهم سند واذراع

وابختم بشكر الله وانا عبده وراجيه
يغفر الذنوب ويرحم المذنب الملتاع

واصلي على سيد البشر سيدٍ نغليه
رسولٍ نحبه حب في داخل الأضلاع

حمدان بن عامر بن مقحص

__________________