( دخيلك يارفيقي )
دخيلك يارفيقي لاتنشدني عن اللي صار
تراني محتزم بالصبر والعزم القوي والحيل

رحل عن ذاكرة فكري وجيه أتدور الاعذار
توارت واختفت مثل الغبار اللي غسله السيل

تعشمت وتأملت إبزماني والزمن غدار
وصارت ذكريات أمسي تشابه مع حلوم الليل

طويت بعالمي ذكرى أليمه والحياه أسرار
وجرحي ماوقف نزفه ونبضي بالعروق يسيل

أعيش وكل لحظه في خيالي ترسم الافكار
شعوري شعر واحساسي يسامر للجدي وسهيل

أنا مهما حصل لازلت شامخ والطموح اكبار
وعيني للبروق وللسحاب اللي بعيد أتخيل

صحيح أتمل الماضي وصوره مالها تذكار
لكن آمالي أكبر والمناكب للحمول أتشيل

دخيلك يارفيقي لاتغارب شي مهما صار
مادام إنك تعرف إن الزمن هذا يهد الحيل

ودخيلك لاتلحقني ملامه والعقول أصغار
ترى مالي عتاب ألا القصيد وكيف بن وهيل

وشرهاتٍٍ على درب المراجل تلفت الانظار
ماهي شرهات خبلٍ مايدور غير قال وقيل

مابين أعتابي وشرهة مواقيفي بحر وانهار
بها تبحر سفينة هاجسي والوقت عدل وميل

أبمشي واتوكل والخُطا للطيب ما تحتار
وميلاد السنين اذبح تمايمها قعود وحيل

ألا ليت الاوادم فاليمين ولاتروح ايسار
وعلى درب المراجل تعقد العزم وتشد الحيل

__________________