الشاعر مهدي
من هواجيس لها فالمرجله حظ وعوايـــــد ***** مرحبا ترحيبة عنوانها طيب وكرامه
ابن عتقان سلمي ويمثل وســــــاع البنايد ***** واخر الايام روح لاشداد ولامسامه
ابن عتقان
من هواجيس تزيد وحظها في الوقت زايد ***** البقا ياهل الشجاعه والكرامه والشهامه
رتبتي رتبة لواء ماني يابن قحطان رايــــد ***** ماتنازل زال هذا الراس تكسيه العمامه
مهدي
والله اني واقف في وقفتي موقف محايد ***** مير فيه اسطور نرسم تحتها خط وعلامه
انت في عيني كبير ومثل ضلع طويق نايد ***** لكن الرجال تدري عن خفاه ابنا عمامه
ابن عتقان
ماعليك من الكلام الي يزور فالجرايـــــد ***** يالحبابي ماتميل راسها غير النعامـــه
ياكثر حساد عبدالله وانا عم الشدايـــــد ***خوف مافالراس خوف ولادخل عظمي رخامه
مهدي
ادري انك في بعض الاحيان تصلاك الوقايد **** يحفظ التاريخ سر العلم لايوم القيامه
ان بغيت الكلمه اللي تنحفظ ضمن الفرايد **** الوكاد انك يابن عتقان خالفت الزعامه
ابن عتقان
امشي برجلي وثوبي معتبر ماهوب بايد **رجل في ساحل عمان ورجل في ساحل تهامه
انت قبل العام داخل معترك فن القصايد *** لاكسبت من القصيد ولاكسبت من الامامه
مهدي
من تشتت فالزمان الصلف صادته الصوايد *** ماعلينا من كثير الهرج يامال السلامه
غير الموضوع الاول ياوجودك بالوجايــــــد *** والحبابي عادته يفرض على الناس احترامه
ابن عتقان
لاتنافق مع عيال العم ماتجني فوايـــــد *** انت اعرفك مع بني قحطان مثل ابودلامه
وسلامتكم