أقدم لكم قصيدة لشاعر/ فهد بن غازي بن هجيان البقيلي السلمي .




الله على اللي لاشهر كنه الطير
حر(ن) ينومس في نهار الهدادي

جيب(ن) مصمم للسفر والمشاوير
فكسار لونه مثل لون الزبادي

ماتسمع بلوفه ولا حنة القير
قيره توماتيك(ن) ولاهو بعادي

لاضاق صدري يازبون المخاسير
من وقتي اللي مستمر في عنادي

ماياقف الا راس قمه شمنصير
والجو يامرزوق رايق وهادي

واشعلتلي نارآ حطبها مزابير
في ليلة(ن) قمرا بها النور بادي

وسويت كيف(ن) فالدلال المباهير
فنجالها يشفي عليل الفوادي

واصخر بيوت الشعر ياخوك تصخير
سوات ابن لعبون وابن المهادي

قصايدن لالقيتها للجماهير
يسمع صداها في جميع البلادي

لو يطمع الناقد على النقد ويغير
ماهو محصل فرصتن لانتقادي

وحولي نشاما فالمواقف مشاهير
قوم(ن) من اهل المعرفه والمبادي

اهل السيوف المرهفات البواتير
لطامة العايل كعام المعادي

ايمانهم تفني الذهب والدنانير
اليا نصاهم من حدته الحوادي

شرواك ياذخر الرجال المناعير
ياشاعر السلمان راع الشدادي

ارتحت من جور الزمن والتفاكير
وهذا هوى نفسي وغايه مرادي