يا مل قلب(ن) كنه بجوف محماس= يروح مثل البن لا صار محموس
يفز قلبي كل ما دق هوجاس =فزة صقر لا فز من كف محروس
وأعوذ بالخلاق من كل وسواس =لا دق في قلبي من الضيق هاجوس
يطري عليه ذكر بالفعل نوماس =فيه الوفاء والطيب والصدق مغروس
ما يتبع النمات في كل مجلاس =ولا هو على بيوت المخاليق جاسوس
تشوف هبة ريح ودلال جلاس=واهل المروه والوفاء حوله جلوس
فنجال دله داير(ن)يجلي عماس =ما بينهم خبيث طبع(ن) ودنفوس
ما بينهم رديان وأنذال وأنجاس =ولا بينهم نقال للهرج هدروس
هرجه قفا يهرج بها كل بلاس =واليا هرج بالكذب بيحوسها حوس
والعشره اللي ما توثق على ساس =سوات تمره داخل(ن) جوفها سوس
لا صار ما تشعل كما النار مقباس =صافي عسل لكن به سم مدسوس
ما هو صويب اللي سلم ضربة الراس =صويب من هو كل ضربه على الراس
قيست في بعض المخاليق بقياس =لكن خاب الظن في باري القوس
كل(ن) على قده يحصله قياس =يكفيه لا ياخذ من ألباس ملبوس
والعود ما ينفع ليا جاه الايباس =مغير عود الطيب لا صار مبسوس
وما كل من يقرب من البحر غطاس =ولا كل جرح تقطعه حدة الموس
وكليب ما همه بعد غدر جساس =تكتب يمينه واصبح العلم مدروس
واللي قعد للذيب في جوف متراس =الذيب حطه بين نيبان وظروس
لقيت في الاصحاب من كل الاجناس =شكل العرب والطبع من طبع هندوس
بعض العرب هرجه كما عقد الالماس =والبعض الاخر هرجته لدغ ناموس
وبعض العرب يبغاك في كل مرواس= يبغاك لا منك غني راعي فلوس
وان طاح حظك بعد ما جاك الافلاس =تدوسك اصحاب الرخا بالقدم دوس
يا وجد روحي كل ما هب نسناس =وجد اليتيم اللي بعد فقر محبوس
راحت حياته كلها هم وأتعاس =ماله رفيق(ن) واصبح الحال ميؤس
بنيت عجز الشطر الاول على آس =والشطر الاخر قام عجزه على اوس
صلوا على اللي بين الهدي للناس =محمد اللي صارت أحداثه دروس
الشاعر/فايز السلمي