قصيدة ظريفة بعث بها أحد الشعراء إلى أصدقاءه يتحدث فيها عن نوع من أنواع السيارات
وهي من طراز جيب الاندكروزر فكسار
وهناك فرق بين الحاضر والماضي حيث أن الشعراء كانوا يتغنون بالخيول ، وينظمون بها الأشعار كما ذكر لنا أكثر من شاعر لعل من أبرزهم عنترة ،وفي بداية هذا القرن وبعداختراع السيارات سمعنا الكثير من الشعراء الذين كتبوا في مديح السيارات وخصوصا ( الجيب، والجمس وغيرها من السيارات ) وكان أحدهم حين يذكر تلك السيارة في قصيدته فإنه يقصد بها سرعة الوصول أومدح صاحب السيارة الذي يركبها لتوصيل رسالة ما ، ولكن قصيدة صاحبنا هنا قد تكون مختلفة نوعا ما ، حيث أنه قد ركز على نوع السيارة ووصفها توصيف غريب جداً
وهي للشاعر المعروف ... مرزوق غازي هجيان السلمي لنستمتع بهذه القصيدة الظريفة.

[poem=font=",5,black,bold,normal" bkcolor="transparent" bkimage="http://www.solaim.com/vb/mwaextraedit2/backgrounds/5.gif" border="double,4,red" type=1 line=1 align=center use=ex num="0,black""]
يا سعيد بن عياد يـا واف الاشبـار =يا كاسب الطـالات برسلـك مشـوار
برسلـك لليابـان وأرسـل مترجـم =لا تعتذر يـا سعيـد مافيـه معـذار
دوك الجـواز وفيـه ختـم السفـارة =ورحلتـك بكـرة لا تحيـر وتحتـار
أركب على اللي تسبق الصوت والريح =فزت كما اللي فز مـن كـف صقـار
وإن جيت لليابان مـن ليلـك ارتـاح =أسكن بفندق مستـوى فايـف ستـار
والصبح غادر طوكيـو يـا صديقـي =سير ألف كيلو شرق مع سكة قطـار
وتلقى جزيرة واسمها صعـب نطقـه =هنشو كيوشو جوهـا ماهـو بحـار
دور مصانـع صانعـيـن المـواتـر =ومصنع تويوتا حوله أسوار وأشجار
قابـل كبيـر مهندسيـنـه وقـلـه =صمم على حسب الطلب جيب فكسـار
مكينتـه عشـرة سلنـدر وبـخـاخ =والسير ما يسمع لـه أصـوات لادار
سلاسـة بلوفـه وصـوت المكينـه =كنه عبادي يعـزف ألحـان الأوتـار
ثـلاث دفرنسـات ســت كفـراتـه =يفتح طريقه فـي تغاريـز وأحجـار
بيبانـه العشـرة تصـمـم بـدقـه =على التساوي جنبـه يميـن ويسـار
وتوايره يـا سعيـد ضـد البناشـر =ماهـي بخنزيـر يبنشـر بمسـمـار
زجاجـه مصمـم علـى الكمبيوتـر =لا يحجب الرؤية ولا يعكـس أنـوار
تمثال كبوتـه علـى شكـل حربـه =سيفين والنخلة علـى شبكـه شعـار
صدام قدامـه كمـا القـوس شكلـه =والونش فالصدام عشـرات الأمتـار
وصدامه الخلفي بوسطـه مجسـات =عند الخطر تشـر بلمبـات الانـذار
توانكـه منهـا اثنـيـن لـوقـوده =واثنين للمـا عنـد حـزات الأسفـار
وثلاجتـه فـي شنطتـه ركبـوهـا =تبريدهـا ينقـص ويـزداد بعـيـار
كبينتـه وقـت الشتـاء يـا دفاهـا =لو كان جو المملكـة بـرد وامطـار
وكبينته فالصيف قطعة مـن الثلـج =لو كان جـو المملكـة حـر وغبـار
باللمـس تكييفـه وباللمـس نـوره =ويشغله مـن بعـد ريمـوت بـزرار
يحـدد مسافاتـه ويكشـف طريقـه =طبلونـه مجهـز بشـاشـات رادار
وجهـاز ماجـلان وجهـاز هاتـف =ارسالها مـا ينقطـع عبـر الاقمـار
قيره توماتيك وعصـا القيـر فضـه =دفعـه سداسـي للمشاويـر صبـار
اربـع شكامينـه ولادسـت ابنصـه =لو كان له جنحان قلنـا لكـم طـار
تسعة عشر كرسي وكرسـي زيـادة =وكرسـي لسواقـه مصمـم لطيـار
مقاعده واحد وعشريـن مـن جلـد =والجلد شغـل يديـن عمـال شطـار
وفصل قطيـره تتبعـه فـي طريقـه =للعفش لو كانـوا يزيـدون الاسعـار
أبيض بياض الثلج يا سعيـد لونـه =واليا جهز سجل على المصنع اقـرار
اقـرار حتـى مـا يسـوون غيـره =وعطهـم حسابـه يـن وإلا بـدولار
ثم اشحنه في البحر وارجع مع الجو =يا مرحبا والعفو يا الصاحـب البـار
واليا استلمته مـن جمـارك بـلادي =دقيت سلفـه وأبتـدا عـد الاصفـار
لا فـر ويلـة فالخطـوط السريعـة =كن التوايـر تحكـي اسـرار للقـار
سيد الصحاري والـدروب العسيـرة =مركـب مريـح وللمهمـات جـبـار
باخذ شهر مقناص وسـط الجزيـرة =نمسي بدار ونصبح الصبح فـي دار
شرق وجنـوب وغـرب وإلا شمـالا =حليب بل وصيـد مـع شبـة النـار
لكـن أنـا مانـي برايـح لحـالـي =باخذ معي من صفوة الناس وأختـار
أبـوي وأنـت وكاسبيـن الجمايـل =شيوخ الغراميل الحشيميـن الاخيـار
شبـاب وثنيـان عنـوان للطـيـب =أهل الكرم والجود والمجـد والكـار
وإن حل طاريهم بوسـط المجالـس =كلن يقـول ونعـم وتكـرار ومـرار
وفهد الحطيم اللـي علومـه جزيلـة =صقر تعـلا فـي منيفـات الاوكـار
والشيخ ابو صافي وابو ستـر معنـا =ومعنا رجال تكرم الضيـف والجـار
منهم سعـد وأيضـا شليـان منهـم =ومنهم جري راع الوفا سر وجهـار
والشيخ ابو نـادر وعايـض سفيـر =والمهدي اللي ينظم أبيـات الاشعـار
وبطي ولد سلطـان وحمـود غنـام =أهل الوفا والعرف وافيـن الاشبـار
واحمد ولد متعب وتركـي عطـا الله =أصحابي اللي ما يبيحـون الاسـرار
والشيخ بن محفوظ والشيخ فيحـان =والشيخ ابو سلطان لا صار ما صـار
صديقنـا يفـرح ولا هـي غريـبـة =وعدونـا نسقيـه كاسـات الامـرار
والمعذرة مـن كـل مـن لا ذكرتـه =الكل لـه حشمـة وقيمـة ومقـدار
ولو كنت أباخذ كل ربعي والاصحـاب =لازم مـع الفكسـار ميتيـن فكسـار [/poem]