[poem=font=",6,darkblue,normal,normal" bkcolor="transparent" bkimage="" border="none,4," type=1 line=1 align=center use=sp num="0,black""]
أشوف برّاق الجفا من ناظرك ليه ينوض=وأشوف نجمي في سما ودّك رجع يومض وميض
ومن الجهات الاربعه اليوم يكنفك الغموض=وش غيّر أحوالك معي ياصاحبي على النقيض
وعهد الصداقه بيننا مصيون ماجاله نقوض=ونهر الوفا من قلبي المخلص عشانك مايغيض
إن كانها كبوة جواد أقول يتبعها نهوض=لكن أخاف من السليم اللي يخالط له مريض
وانا ماجندل همتي بأنيابه الوقت العضوض=ولا خدش براءتي ماخطه البنط العريض
وصبري على الشدّات ماخذته سلف والاّ قروض=جاني من الحي الكريم اللي بحر جوده يفيض
وخطّة خفافيش الظلام اللي تبي الصابر يروض=جتهم جميع بنودها من صاحب القلب البغيض
أسمع واشوف حشودهم لو كان لي طرفٍ غضوض=ورميتهم في قلوبهم بأحرّ من يوم المقيض
وبعض المعاني مذهبي يردني فيها لا خوض=نظرة عيوني للسما ماتلد عيني للحضيض
وان شالت الاقدار غالي قلت لي ربٍ يعوض=وعزّيت قلبي فالليال السود بأبيات القريض
وكلي رجا فالله لو قالولي الدنيا حضوض=اللي إنكتب للمجتهد ما تاخذه يد الحضيض
هذي هجوس اللي يخاف الله ويصلي الفروض=نطق بها لسانه لكم من طيب والنيات بيض
[/poem]