توك صغير وهمّك شماغ وعقــال
والبــاب ماهو عن نواياك مصكوك

أحلامك أحـــلام وطموحاتك آمال
ابوك يقدم لك ما فــ البنك والبوك

لاعاد تنشدني يافارس عن الحال
وأنته تشوف الدمع لازال مسفوك

مرت سنين وصآفي الدمع همال
والقلب بين النار والموت والشوك

اسج أدور شي(ن) يوســــع البال
لو سلوتي من دونها ريب وشكوك

يالوع قلبي عــــد ما ميل ظــــلال
عندي مع اللوعــه مواثيق وصكوك

من شي في صدري نذيراً بالاهوال
صمام في قلبي من الوقت مربوك

يابوك انا في يوم مقفي ورحـــــال
وتبكي علي ايام وتعـــــــزي اخوك

اوصيك يافارس ترى الوقت ميـــــال
اسمع كلامي زين واحرص وانا ابوك

اوصيك تقوى الله في كل الاحــوال
ولا تجافي الاقــراب لو كان جافوك

خلك مع ربوعك كما الغيث همـــال
ان طابت افعالك ترى النــاس حبوك

والزم حدود الطيب في كل الافعـال
ان شانت افعالك ترى الناس شانوك

ولا تصاحب الرديان شينين الاعمال
ان جيتهم ســـــــاعة لوازمك خلوك

ولا تقضي الحاجات من عند الانذال
ان سنحة الفرصــه لهم يوم هانوك

وحذر تقرّب مجلس القيل والقـــال
احبــــاب قدامك واذا قفيت سبوك

راقية ورائع صح لسانك ولا فض فوك