الوجد

شآعر لايشبهٌ احداً ..
انفرد .. بذوقة .. بفكرهـ .. بحروفهـ ..






أستمتعوا مع العذب ...|جوهر غالب الحربي |...

الوجد حت الحال حت وحصدها
وبانت من الفرقا مفاصل عظامي

الصبر جارح والجفا امر وادها
وش حال من حاله عليلة وكامي

اللي طلب نور العيون وفقدها
ماله صبح ليلة وصبحه ظلامي

وين انت يانور العيون وسعدها
يامهجتي ياغايتي يامرامي

غيبتك هذي وش حصل من بعدها
لو اني اشرح مايكفي كلامي

اخاف اجيك بكلمة(ن) تنتقدها
من فيض غيض(ن) بين الاضلاع زامي

وتقول هذي حجة(ن) يعتمدها
وتاتي برد(ن) مايناسب مقامي

والا سولف شهرازاد وبلدها
والسندباد ومبهمات الغرامي

انته تحل قيودها وتعقدها
بامرك ومن يمناك يمشي نظامي

كل القضايا في يمينك سندها
انت القضاء وانت الرضا والمحامي

نفسن تحبك عزها لاتحسدها
ترى الجفا والظلم عيب وحرامي

وترى المحبة كل ماطال امدها
يطلع لها بروح طلع ونوامي

عينك عن اسرار الغلا من نشدها
اضحك وانا من لهفة الشوق ظامي

الله يالقيا النفوس بوعدها
يكفي ويغني عن شراب وطعامي

والله لو كان المصافح بيدها
والا الكلام ونظرة(ن) وابتسامي

ناهيك عن ماتلمسه من جسدها
دواك لامنك طواك الهيامي

اشفق عليك امن الحنون لولدها
اللي لفاها بعد عشرين عامي

من عقب ماطال الفراق ولهدها
جاها الخبر والحال غادن عدامي

وطاحت عليه وضاع منها جلدها
من واهجن بين المعاليق حامي

وابكت عيون الحاضر اللي شهدها
ومن البكا عجزت ترد السلامي

وسهرت عليه بليلة(ن) مارقدها
تنحب بصوت(ن) مثل صوت الحمامي

واللي رفع سبعن بليا عمدها
علام ماب الكون منش الغمامي

اني فلانسى من عطتني عهدها
الا اني انسى حجتي مع صيامي

يامن حياتي مع حياته عقدها
في روحتي في جيتي في منامي

روحي عن العالم لحاله فردها
قلبي تولع به ولع واستهامي

هاك العيون وهاك روحي وحدها
مع كل تقديري وجل اهتمامي

دمتم بوووووود