|
#1
|
|||
|
|||
قصيدة تستحق القراءة
--------------------------------------------------------------------------------
قصيدة تستحق القراءه كل بيت حكمه أنقلها لكم ولا أدري من هو الشاعر ؟ معوّض خير ياحيٍ تهقوى في الزمـان ومـال سنينك لو رقيـت بعدلهـا يطرحـك مايلهـا تعلّم وإعرف إن الدرب قدامك سهـل وجبـال جبـال تطولهـا وجبـال بعيونـك تخايلـهـا ومعوّض خير ياحيٍ وردت الماء بدون حبـال يطول بك الوقوف وشربة المـاء ماتحصّلهـا وقوفك عند راس البير مايسقيك لـو فنجـال ولاينفعك شوف الجمـه اللـي منـت طايلهـا ومعوّض خير ياحيٍ خدعك من الرجال أشكـال تشوف أشكالها وتحطها أرفـع مـن منازلهـا تعلّم من زمانك لاتصير مـن أجهـل الجهـال ترى في كل يـوم تجيـك عبـره لاتجاهلهـا إذا ربي وهب لك عقل تلقى في الرجال رجـال تعرف اللـي يطلّـع قيمتـك واللـي ينزلهـا ترى من بعض مايندي الجبين ويحرج الرجال لياسـاق الميانـه فـي نفـوسٍ ماتقبّلـهـا ومهما شفت في صاحبك من نخوه وطيبة فال ترى بعض السجايـا كثـرة الإلحـاح يقتلهـا معاريف الرجال ديون وديون الرجـال ثقـال لياصرت متعافي ليش تغـرق فـي جمايلهـا رصيدك في حياتك سمعتك مع طيبيـن الفـال رجال الطيب والمعروف بالمعـروف عاملهـا ولاتبدي بجاهـك فـي مقـامٍ مايسـر الحـال ولاتشفـع لنـاسٍ ماتنومـسـك بفعايلـهـا لياجاتك تعذّرهـا مـدام العـذر لـه مدخـال ووقت الجد قول الهـا الصحيـح ولاتجاملهـا وخذ منـي نصيحـه لاتصـدق كـل ماينقـال يجـرك للنميمـه ليـن يطرحـك بحبايلـهـا يجيلك ناقـل النمّـات بهـروجٍ تغـث البـال سوالف في قفاك وحظك أطيب يـوم تجهلهـا يبـرر بالحميـه والصداقـه شينـة الأفعـال يجمّـل صورتـه بعلومـه اللـي ماتجمّلـهـا ولو كانت حميه فيك رد المخطيه فـي الحـال ولاكان إستمعها فـي قفـاك وجـاك شايلهـا ترى من جاب لك ودّى وهذي عـادة النقـال يحاول يقتنص من فمك كلمـه لأجـل ينقلهـا ومثل ماقال عندك راح عنك وعند غيرك قـال وزوّد عشر فوق الكلمه اللـي كنـت قايلهـا تجنّب مجلسه لاتجلس إلا مع كريـم خصـال تحمّـل ميلتـه وإن ميلـت ميلتـك ينقلها ولاتصبر على الجار الردي لوهي ثلاث ليـال تضـرك جيرتـه لوكـان بيبانـك تقفلـهـا وبيع الدار بأول سومةٍ تعرض علـى الـدلال ورزقـك عنـد ربٍ كاتـب اللقمـه وكافلهـا وبنتك لاتزوجها الردي لوهـو كثيـر المـال تربيهـا علـى الطـالات وتشـوّه سلايلهـا وكم من لاش يرمي خيبة إبنه فوق راس الخال لوإن الخال من روس الرجال ومـن دلايلهـا ليامنك عرفـت تميّـز الطيّـب مـن البطـــــال وفادتك التجارب في الحيـاة وفـي مسايلهـا وكشفت الفرق مابين الصحيح وحيلة المحتـال وتعلمت الفراسه في الوجيـه اللـي تقابلهـا بعد هذي ترى مالك غنى عن صحبة العقّـال يدلونـك بـرايٍ ينقـض الدعــــــــــوه ويفتلهـا يقولون الرجال اللي سوالفهـم حِكـم وأمثـال ليامن ضـــــاعت الحيلـه يـدل القـوم عاقلهـا نصيحة واحدٍ جرّب وشاف من الزمان اهـوال يقدّم لـك خلاصــــــة هجـرةٍ جـرّب هـوايلهـا |
#2
|
||||
|
||||
رد: قصيدة تستحق القراءة
اخي
السيف البتار شكرا على نقل هذه الرائعه |
#3
|
||||
|
||||
رد: قصيدة تستحق القراءة
صح لسسسسانه .. وسلمت ع النقل ..
تحيتيـ ..
__________________
............... |
#4
|
|||
|
|||
رد: قصيدة تستحق القراءة
فعلاً قصيده رائعه
شكرًا يالسيف البتار على النقل تحيه لك ومانعدمك يالغالي
__________________
اللهم صَلِّ على سيـّدنا مُحمـّد عدد ما ذكره الذّاكرون الأبرار و صَلِّ اللهم على سيـّدنا مـُحمـّد ما تعاقب اللـّيل و النـّهار و على آله و صحبه من المـُهاجرين و الأنصار و سلِـّم تسليماً كثيراً ، برحمتك يا عزيز يا غفـّار |
#5
|
||||
|
||||
رد: قصيدة تستحق القراءة
قصيده رائعه
ونشكر اخينا العزيز على النقل |
#6
|
|||
|
|||
رد: قصيدة تستحق القراءة
تشرفت بمروركم من هنا لا هنتم |
#7
|
||||
|
||||
رد: قصيدة تستحق القراءة
\7
__________________
منطق حروفي على صفحاتي يمثلني=أكتب اللي عارف أنه ما ينقص فيه الثقه بالنفس والجب والنقد يسعدني=والتبجخ والغرور ألة قتل ذاتيه
|
#8
|
||||
|
||||
رد: قصيدة تستحق القراءة
هذه القصيدة للشاعر المبدع شاعر الحكمة الشاعر الكبير /عبدالله الطلحي
فعلا قصيدة رائعة وتستحق القراءة نشكرك على النقل ولاعدمناااك |
#9
|
|||
|
|||
رد: قصيدة تستحق القراءة
نقل مميز من عضو مميز
تقبل مروري |
#10
|
|||
|
|||
رد: قصيدة تستحق القراءة
للجميع مني الشكر على التواجد والحضور هنا لا هنتم
وشكر خاص للأخ / عبدالله العطافي الذي ذكر لنا اســــــــــــم صاحب القصيــــــــــــــــــدة |
تعليمات المشاركة |
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك
BB code is متاحة
الابتسامات متاحة
كود [IMG] متاحة
كود HTML معطلة
|
|